Sekretari i Shtetit të SHBA-së uron 109 vjetorin e Pavarësisë së Shqipërisë – Blinken: ‘Krenarë të quajmë Shqipërinë një shtet mik, aleat dhe partner’
Sekretari i Shtetit të SHBA-së Anthony Blinken nëpërmjet një njoftimi të postuar nga faqja zyrtare e Ambasadës Amerikane në Tiranë ka uruar Shqipërinë për Përvjetorin e 109 të Pavarësisë.
Njoftimi i plotë i Blinken:
“Në emër të Shteteve të Bashkuara të Amerikës, përgëzoj popullin e Shqipërisë në Përvjetorin e 109 të Pavarësisë. Miqësia jonë e thellë dhe e qëndrueshme daton më shumë se një shekull më parë, kur presidenti Woodrow Wilson mbrojti me forcë pavarësinë e Shqipërisë në Konferencën e Paqes në Paris, në 1919.
Që prej asaj kohe, Shqiptarët kanë treguar forcë të madhe dhe qëndrueshmëri duke hedhur poshtë shtypjen e një diktature komuniste dhe duke ndërtuar një demokraci të përkushtuar ndaj tolerancës, të drejtave të njeriut dhe integrimit evropian. Shqipëria e ka shfaqur këtë frymë sërish këtë vit duke hapur dyert për afganët në nevojë dhe ata vazhdojnë të ofrojnë një port të sigurt për ta, siç bënë me mijëra hebrenj gjatë Luftës së Dytë Botërore dhe me grupe të tjera të larguara prej persekutimit gjatë dekadave të fundit.
Në 2021, ne shënuam 30 vite marrëdhënie diplomatike të rikthyera, duke reflektuar mbi gjithçka amerikanët dhe shqiptarët kanë arritur së bashku prej vitit 1991. Sot, ne jemi aleatë në NATO dhe vitin tjetër ne do shërbejmë bashkë në Këshillin e Sigurisë së OKB-së. Shtetet e Bashkuara janë të përkushtuara për të mbështetur institucionet demokratike të Shqipërisë, reformat në drejtësi dhe ekonomike dhe të ardhmen në Bashkimin Evropian.
Ne presim të forcojmë edhe më tej miqësinë tonë dhe mbetemi krenarë të quajmë Shqipërinë një shtet mik, aleat dhe partner.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.