“Sekserët” e zyrtarizuar, qeveria vendos: Largim nga administrata brenda 100 ditëve të para. Urdhër i prerë, ja çfarë ndodh me inspektoriatet dhe hetimin tatimor
Ata qe bëjnë ndërmjetësin te dogana do të largohen brenda 100 ditëve të para të kësaj qeverie. Kreu i qeverisë, Rama deklaroi se një “tufë sekserësh” të zyrtarizuar që shëmtojnë pamjen e administratës, në veçanti në Portin e Durrësit do të largohen.
“Policinë gri e kemi kthyer në kazermë, sapo edhe të fshihen nga legjislacioni dhe ikin në shtëpi. Inspektoriatet duhet të jenë në ristrukturim dhe nuk duhet të vendosin asnjë gjobë deri sa të bëhet ristrukturimi. Inspektoriatet janë banda që lëshohen, në mbrojtje të mjedisit, në mbrojtje të kullotave dhe marrin vetëm lekë, i bien në qafë çdo njeriu që bën punën e tij”, shprehet Rama.
Në fjalën e tij, Rama foli edhe për hetimin tatimor.
“Edhe hetimi tatimor është në kazermë. Lëvizja do të bëhet me leje të përcaktuar dhe të detajuar për të shkuar për të bërë hetime. Ju nuk duhet të bëheni palë me ta, por të mbroni veten tuaj duke bashkëpunuar me ne. Kur të vijnë në kompanitë tuaja mos i pranoni me veshjet e tyre të papërshtatshme”, tha Rama.
Në vëmendje të këtij diskutimi ishte edhe platforma online e bashkëqeverisjes.
“Brenda javës së ardhëm ne do publikojmë platformën online të bashkëqeverisjes, e cila do të ketë një dritare të veçantë për biznesin, për çdo biznes të madh, te mesëm dhe të vogël, që të ketë një linjë direkte me këtë godinë në kohë reale, për çdo lloje cenimin apo sjellje te padenjë”, tha Rama.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.