Sektorët që shqetësojnë qytetarët: Në 2016, në KLSH u rritën ankesat për pronësinë, u ulën ato për administrimin financiar
Kontrolli i Lartë i Shtetit ka publikuar tashmë raportin vjetor që pritet të prezantohet në Kuvend në javët në vijim, në kuadër të raportimit vjetor të intitucioneve. Krahas dëmit të konstatuar e masave të rekomanduara, një element i raportit është ai që lidhet me trajtimin e ankesave të qytetarëve. Përgjatë vitit 2016, rezulton se KLSH ka trajtuar 660 letra dhe ankesa, një pjesë e mirë e të cilëve ka rezultuar jashtë kompetencave dhe juridiksionit të institucionit.
Referuar të dhënave të raportit të vitit 2016 ku pasqyrohen fushat kryesore të shqetësimit publik për çështje të qeverisjes në Shqipëri, rezulton se numri më i lartë i ankesave është për çështje të privatizimit dhe kthimit të pronës me 52%. Ndërkohë, 15 % e ankesave janë për çështje të administrimit financiar dhe prokurimit publik, 4% për çështje të taksave e tatimeve si dhe 29% për çështje të tjera.
Krahasuar me vitin 2015, gjatë vitit të kaluar rezulton se ka thuajse një dyfishim të ankesave drejt institucionit më të lartë të auditimit pasi në vitin paraardhës janë adresuar nga qytetarët 382 ankesa dhe letra. Po ashtu, rezulton se ka thuajse një dyfishim të ankesave e letrave për çështje që lidhen me privatizimin dhe kthimin e pronës (37% në 2015) ndërsa ka një përgjysmim për çështje që lidhen me administrimin financiar (29% në 2015). Ndërkohë, rritje me 2 % ka edhe për ankesat që lidhen me çështjet e tatimeve e doganave.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.