Sektori i ndërtimit në Bashkimin Europian – Shkurti me rritjen më të madhe nga viti 2013
Prodhimi në ndërtim në zonën Euro u rrit me 6,9% në Shkurt, krahasuar me muajin paraardhës. Kjo shihet si një sinjal pozitiv, pas rënies në muajin Janar me 1,5%.
Krahasuar me të njëjtën periudhë të një viti më parë, prodhimi në sektorin e ndërtimit ka një rritje me 7,1% në zonën Euro dhe me 5,2% në BE.
Veprat publike janë ato të cilat kanë kontribuar më shumë në këtë rritje, sidomos në zonën e 19 shteteve që përdorin monedhën europiane me një rritje 10,1%, dhe 5,5% në BE.
Shtetet me rritjen më të madhe janë Slovenia me 25,7%, Belgjika me 18,7% dhe Gjermania me 13,6%. Sektori i ndërtimit në Sloveni konfirmon kështu momentin shumë të mirë, me një rritje vjetore prej 21,4%.
Ndërkohë vendet në të cilat ky sektor ka patur rënie, paraqesin shifra jo shqetësuese, ku rënia më e madhe ka qenë në Poloni me 2,8% dhe Suedi me 1,8%.
Sektori i ndërtimit ka qenë një nga më të prekurit nga kriza ekonomike, me një rënie të ndjeshme deri në vitin 2013. Prej kësaj periudhe rimëkëmbja e këtij sektori ka qenë e ngadaltë dhe e vështirë, ndërsa muaji Shkurt i këtij viti përfaqëson rritjen më të madhe në pothuajse tre vite.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.