Sektori industrial në Eurozonë – Prodhimi rritet bindshëm, tregon për një fuqizim të ekonomisë
Prodhimi industrial në Eurozonë ka treguar rritje sipër projeksioneve dhe normën më të lartë në 9 muaj për Gushtin, ndërkohë që prodhimi i mallrave kapitale, si makineritë, janë rritur ndjeshëm.
Treguesi sinjalizon një fuqizim të ekonomisë së bllokut të valutës së përbashkët në gjysmën e dytë të këtij viti.
Prodhimi total u rrit me 1.4% në Gusht me bazë mujore dhe me 3.8% krahasuar me të njëjtën periudhë një vit më parë, raporton zyra e statistikave e Bashkimit Europian.
Shifrat thyen lehtë projeksionet e ekonomistëve që qëndronin për një rritje me 0.5%. Norma e Gushtit ishte më e larta që prej Nëntorit 2016.
Eurostat rishikoi gjithashtu prodhimin për muajin Korrik, në 0.3% nga 0.1% me bazë mujore. Të dhënat sjellin optimizëm për ekonominë e Eurozonës në gjysmën e dytë të vitit, ndërkohë që rritja e prodhimit të mallrave kapitale, prej 3.1%, tregon se bizneset nuk po ndalojnë investimet.
Prodhimi i mallrave të qëndrueshëm të konsumit, si automjetet, ishte gjithashtu i fortë, duke treguar një rritje me 1.3% për muajin, ndërkohë që industria pret një rritje të kërkesës nga konsumatorët për mallra më të shtrenjtë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.