Serbi, inflacioni arrin 9,6% në prill – Guvernatorja e Bankës Qendrore: Niveli maksimal në korrik, më pas nis rënia!

Inflacioni në Serbi ka vijuar rritjen dhe për muajin prill u regjistrua në nivelin prej 9,6% në bazë vjetore. Guvernatorja e Bankës Kombëtare të Serbisë, Jorgovanka Tabakoviç, theksoi se, është ruajtur stabiliteti relativ i kursit të këmbimit, që së bashku me pritjet afatmesme të inflacionit të sektorëve financiarë dhe të korporatave, të ankoruara brenda intervalit të tolerancës së objektivit, veproi si një frenim i fortë që e mbajti inflacionin bazë më të ulët.

Sipas kreut të Bankës Qendrore, Prodhimi i Brendshëm Bruto i Serbisë mbeti relativisht dinamik në tremujorin e parë të këtij viti, me 4.3%. Rritja u ndikuar kryesisht nga aktivitetit në sektorët e shërbimeve dhe industrisë në anën e prodhimit dhe nga konsumi dhe investimet, përfshirë inventarët, në anën e shpenzimeve.

Ndërkohë, eksportet neto dhanë një kontribut negativ më të lartë se sa ishte parashikuar mes importit të rritur të energjisë, por edhe të pajisjeve dhe mallrave të ndërmjetme për zbatimin e projekteve investuese, megjithëse prodhimi i mineraleve dhe rrjedhimisht, eksporti vazhdojnë të shënojnë ritme të larta rritjeje.

Duke pasur parasysh efektet negative të prodhuara deri më tani nga konflikti i Ukrainës, kryesisht ndikimi i tij në çmimet globale të energjisë dhe lëndëve të tjera të para, dhe rishikimet që rezultojnë të perspektivës globale nga institucionet kryesore ndërkombëtare, Banka Kombëtare e Serbisë ka rishikuar projeksionin e Prodhimit të Brendshëm Bruto për këtë vit.

Sipas projeksionit të ri, rritja e ekonomisë do të jetë nga 3,5% në 4,5%, ose 0,5% më pak nga parashikimet në muajin shkurt. Sipas Tabakoviç, inflacioni pritet të arrijë kulmin në qershor dhe korrik në një nivel maksimal prej 10.5% dhe më pas do të fillojë të tkurret.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.