Serbi, ndërtimi i parkut industrial financuar nga Kina nis vitin tjetër – Do të krijojë 50 mijë vende pune
Punimet për ndërtimin e parkut industrial në Beograd pritet të nisin vitin e ardhshëm. Vendimi për ndërtimin e tij u mor bashkarisht nga Presidenti serb Aleksandar Vucic dhe nga Presidenti kinez Xi Jinping, ndërsa financimi do t’i takojë qeverisë së Kinës.
Ministri serb i Inovacionit dhe Zhvillimit Teknologjik, Nenad Popovic u shpreh se parku do të shtrihen në rreth 320 hektarë tokë në të majtë të urës Pupin në Borca. Sipas tij, ky do të jetë parku industrial më modern në Europën Juglindore.
Deklaratat e ministrit erdhën gjatë prezantimit të punës së 100 ditëve të para të qeverisë së Serbisë.
Popovic tha se mbi 1 mijë kompani teknologjie të lartë do të vendosen në park, duke hapur rreth 10 mijë vende pune direkte dhe rreth 30 mijë – 40 mijë vende pune në mënyrë indirekte.
“Ne presim që pjesa e aspektit komercial të përfundojë këtë vit, kështu që ndërtimi të mund të nisë vitin tjetër”, tha ministri.
Sipas qeverisë, projekti pritet të ndihmojë që inxhinierët e rinj të qëndrojnë në Serbi, si edhe do të përshpejtojë zhvillimin ekonomik dhe teknologjik të vendit. Ai pritet edhe të shënojë Beogradin në hartë, si një qendër për zhvillimin e nanoteknologjisë, bioteknologjisë dhe aplikimin e sistemeve inovative.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.