Serbia, lidhje gazi me Rumaninë – Pritet të nisë ndërtimin e tubacionit të transportit 12.8 km

Zëvendëskryeministrja e Serbisë dhe njëkohësisht ministre e Minierave dhe Energjisë, Zorana Mihajloviç, deklaroi se Serbia do të përgatisë projektin dhe dokumentacionin teknik për të ndërtuar një tubacion të transportit të gazit 12.8 km nga Mokrini, verilindja e Serbisë, në kufirin rumun, i cili do t’i mundësonte vendit lidhjen me sistemin Transgaz të Rumanisë dhe gazsjellësin BRUA.

Mihajloviç u takua me homologun rumun Virgil-Daniel Popesku për të diskutuar zbatimin e projekteve të përbashkëta, përparimin e bashkëpunimit në sektorin e energjisë së rinovueshme dhe ndërtimin e një ndërlidhjeje gazi. Ajo tha se lidhja në sektorin e gazit dhe ndërtimi i objekteve të reja të prodhimit të energjisë ishin prioritete për Serbinë.

“Serbia dhe Rumania kanë tradicionalisht marrëdhënie të mira dhe miqësore, që është një bazë e shkëlqyer për diskutime rreth projekteve të përbashkëta në të ardhmen. Këtë vit, Serbia filloi ndërtimin e një gazsjellësi Nish-Dimitrovgrad, i cili do të na mundësojë të marrim gaz edhe nga një terminal LNG, në Greqi dhe nga Azerbajxhani, por plani ynë është që të lidhemi edhe me fqinjët e tjerë nëpërmjet tubacioneve të gazit dhe të bëjmë një hartë të lidhjes së gazit, pasi kjo është e vetmja mënyrë që ne të arrijmë sigurinë në këtë sektor”, tha ajo.

Sipas Mihajloviç, objektivi është reduktimi i prodhimit të energjisë nga karburantet fosile dhe rritja e përqindjes së kapaciteteve gjeneruese që përdorin burime të rinovueshme të energjisë. “Në planin tonë të ri të investimit, me vlerë mbi 35 miliardë euro, përveç ndërtimit të një termocentrali hibrid të kthyeshëm Djerdap 3. , ne duam gjithashtu termocentrale të reja diellore dhe të erës”, deklaroi ajo.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.