Serbia përmbush të gjithë objektivat e FMN – Me tepricat në buxhet do të shpërblejë pensionistët e administratën publike

Fondi Monetar Ndërkombëtar ka përmbyllur misionin e fundit të vlerësimit në Serbi, duke dhënë edhe gjykimin për situatën ekonomike dhe financiare në vend. Kriteret e performancës të caktuara në fund të Shtatorit 2017 janë tejkaluar në mënyrë të ndjeshme dhe prandaj Serbisë do t’i vihen në dispozicion 119.4 milionë euro nga Marrëveshja me FMN-në. Kjo e çon vlerën totale të fondeve të disponueshme në 1.05 miliardë euro, megjithëse Autoritetet serbe kanë treguar se nuk kanë ndërmend t’i shfrytëzojnë.

“Performanca e fortë ekonomike vazhdon. Pavarëssht një ngadalësimi të përkohshëm shkaktuar nga thatësira dhe ndikimit në prodhimin e energjisë, aktiviteti ekonomik mbetet i fortë, mbështetur nga një rritje e qëndrueshme e eksporteve, konsumit privat dhe investimeve.

Kushtet e tregut të punës kanë vazhduar të përmirësohen, me punë të reja të krijuara në sektorin privat dhe një rënie të ndjeshme të papunësisë. Ne e parashikojmë rritjen e PBB në 2% në vitin 2017 dhe në 3.5% në vitin 2018”, raporton FMN.

Edhe performanca fiskale e vendi ka vijuar mbiperformancën dhe sipas ekspertëve të misionit, kjo i atribuohet të ardhurave në rritje, një projektligji për norma interesi më të ulëta dhe ulja e shpenzimeve buxhetore.

Për këtë vit balanca e buxhetit projektohet të jetë zero, krahasuar me tragetin fillestar të buxhetit në shifrën 1.7% të PBB. Gjatë muajit shtator, raporti borxh publik – produkt i brendshëm bruto ra në 65.4%, mbi 10% më pak se gjatë pikut të borxhit në vitin 2015.

Duke parë rezultatet pozitive, qeveria planifikon të përdorë një pjesë të të ardhurave në buxhet për t’i dhënë pensionistëve një bonus, por edhe për bonuse në pagat e administratës.

Si probleme të vetme, FMN vlerëson disa dobësi strukturore në sektorin publik, të cila duhen zgjidhur përmes reformave. Financimi nga shteti i shoqërive publike të dobëta është ulur ndjeshëm, por disa ndërmarrje, sidomos në sektorin petrokimik dhe të minierave kanë ende vend për zgjidhje.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.