Serbia siguron 8 mln doza të vaksinës, Brnabiç: “Synojmë të vaksinojmë të gjithë popullsinë deri në Maj”

Serbia ka arritur marrëveshje me disa prodhues të vaksinave të Covid-19, përfshirë firmat kineze, për të rezervuar deri në 8 milionë doza, që mund të imunizojnë 4 milionë njerëz, sipas Kryeministres Ana Brnabiç.  Deri më tani, Serbia ka vaksinuar mbi 9,300 njerëz që ndodhen në rrezik të lartë të Covid-19, përfshirë të moshuarit dhe punonjësit e kujdesit shëndetësor.  Vendi do të caktojë një qendër të vaksinimit tek “Sava Centar”, një qendër e kulturës, biznesit dhe mbledhjeve ndërkombëtare në Beograd.

Njerëzit do të mund të prenotojnë vaksinimet në rrjet këtë javë. Brnabiç tha gjithashtu se Serbia ka marrë licensën e eksportit për vaksinat e koronavirusit nga Kina. Deri në fund të muajit Janar, Serbia do të importojë një total prej 2 milionë doza të vaksinave.

Kryeministrja shpreson që e gjithë popullsia e vendit të vaksinohet deri në Maj apo Qershor.  Nëse gjithçka shkon mirë, Serbia do të bëhet vendi i parë në Europë që e arrin këtë objektiv.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.