Serbia do të ndërtojë fermën eolike të katërt më të madhe në Europë – Nënshkruhet financimi prej 300 milionë eurosh
Një park eolik, i përbërë nga 57 turbina ere do të ndërtohet në Serbi, duke e shndërruar vendin në liderin rajonal të kësaj energjie të rinovueshme. Kapaciteti i instaluar do të jetë 158 MW dhe do të prodhojë 457 GWh energji elektrike në vit, të mjaftueshme për të furnizuar 113 mijë shtëpi.
Për ta përfytyruar energjinë e prodhuar, mund të themi se ajo është e barabartë me 1/10 e energjisë së prodhuar nga hidrocentralet publike në vend gjatë vitit 2016.
Ferma eolike e Cibuk 1 do të ngrihet 50 kilometra në verilindje të Beogradit dhe do të shtrihet në një sipërfaqe prej 37 kilometrash katrorë. Impianti pritet të lidhet në rrjet në gjysmën e parë të vitit 2019 dhe krahas energjisë së prodhuar, do të reduktojë ndotjen e dioksidit të karbonit me mbi 370 mijë tonë.
Projekti po zhvillohet nga Vetroelektrane Balkana, një kompani e zotëruar nga Tesla Wind, sipërmarrje e përbashkët mes Masdar, një kompanie nga Abu Dhabi dhe Cibuk Ëind Holding, pjesë e një zhvilluesi nga SHBA.
“Ky projekt nënvizon tërheqshmërinë e tregut serb për investime në energjinë e rinovueshme dhe ka potencialin për t’u bërë një portë për projekte të tjera në rajon”, tha Mohamed Al Ramahi, CEO i Masdar.
Kompanitë nënshkruan në prezencën e presidentit Aleksandar Vucic një marrëveshje kredie prej 300 milionë eurosh, nga të cilat 215 milionë euro do të financohen në mënyrë të barabartë nga BERZH dhe nga ICF e Bankës Botërore.
Cibuk 1 do të jetë ferma diellore e katërt më e madhe në Europë dhe do të krijojë 400 vende pune gjatë ndërtimit, si edhe do të përmirësojë infrastrukturën lokale me ndërtimin e 50 kilometrave rrugë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.