Sezoni turistik – Lehtësi për lëvizjen e shtetasve në pikat e kalimit kufitar
Në të gjitha pikat e kalimit kufitar të vendit tonë po zbatohen masat shtesë për lehtësimin e personave përgjatë sezonit turistik. Zëvendësdrejtoresha e Përgjithshme e Policisë së Shtetit, Aida Hajnaj, ka inspektuar pikat e kalimit kufitar në jug të vendit për të parë zbatimin e masave shtesë për sezonin veror 2018. Hajnaj ka konstatuar se masat shtesë për një sezon turistik veror sa më të sigurtë po zbatohen me korrektësi nga ana e Punonjësve të Policisë dhe ka theksuar se zbatimi i këtyre masave ka sjellë më shumë siguri për pushuesit në të gjitha plazhet e vendit.
“Në të gjitha Pikat e Kalimit Kufitar, si në hyrje dhe në dalje janë shtuar sportelet edhe burimet njerëzore, me punonjës të policisë Kufitare, me qëllimin e vetëm për një menaxhim sa më të mirë të lëvizjes në hyrje dhe në dalje të shtetasve, dhe për një shërbim sa më të kulturuar. Në pikën e Kalimit Kufitar Qafë-Botë, gjatë periudhës së sezonit turistik, që nga Qershori deri në 16 Gusht 2018 kanë hyrë rreth 105 mijë shtetas nga të cilët 73 mijë shtetas janë të huaj. I njëjti kapacitet mund të themi dhe i njëjti fluks është edhe në Pikën e Kalimit Kufitar Port-Sarandë ku kanë hyrë rreth 125 mijë shtetas nga të cilët 104 mijë shtetas janë të huaj. Nga Komisariati i Policisë Kufitare Sarandë po punohet dhe po monitorohet dhe po zbatohen me korrektësi të gjitha masat për përballimin me sukses të sezonit turistik veror 2018. Gjithashtu janë marrë masat dhe po ndiqen me korrektësi zbatimi i detyrimeve ligjore për sa i përket lëvizjes së mjeteve lundruese dhe të motorëve të ujit.”
Sipas Hajnaj, Policia e Shtetit do të monitorojë dhe do të menaxhojë deri në fund, sezonin turistik duke zbatuar me korrektësi të gjitha masat e marra, me qëllim mbylljen me sukses të këtij sezoni dhe pa asnjë lloj incidenti.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.