Sezoni turistik, në rrezik nga Delta / Autoritetet në Europë po marrin masa për të parandaluar përhapjen
Gjatë periudhës së pandemisë, asnjë industri tjetër nuk u godit aq rëndë sa sektori udhëtimeve dhe turizmit. Avionët u ulën në tokë, hotelet dhe resortet u mbyllën, ndërsa njerëzit ishin të detyruar të qëndronin në shtëpi. Disa vende në Europë, si Greqia, Spanja dhe Portugalia, mbështeten në turizëm për të rritur ekonomitë e tyre. Mijëra biznese, familje dhe komunitete lidhen drejtpërdrejt me suksesin apo dështimin e sezonit turistik. Ndërsa vaksinimet kundër Covid-19 u përhapën në të gjithë Europën, që në fund të 2020, kishte shumë shpresa se kontinenti do të kishte një sezon të suksesshëm turistik, gjatë këtij viti. Por, tashmë duket se sezoni është i pasigurtë pasi rastet e infektimeve me variantin Delta të koronavirusit po rriten me shpejtësi në Europë, duke detyruar autoritetet të vendosin rregulla të reja si dhe karantina të mundshme. Pavarësisht përpjekjeve në kontinent për të ndaluar variantin Delta, përhapja e pashmangshme ka ndodhur tashmë dhe përfaqëson numrin më të lartë të infektimeve në çdo vend. Holanda dhe Spanja po përballen me rritje të konsiderueshme të rasteve të reja, që kryesisht mendohet se janë mbështetur nga jeta e natës, pasi të dyja vendet rihapën klubet e natës në fund të qershorit, për ta ndryshuar më pas këtë rregull dy javë më vonë. Ndërkohë, Franca deklaroi se po hynte në valën e katërt të pandemisë në fillim të kësaj jave.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.