Sezoni veror nuk e shpëtoi dot turizmin – Rënie deri në 35% e indikatorit të shitjeve dhe deri në 27% i numrit të punonjësve
Sezoni turistik veror nuk e ka shpëtuar dot sektorin e turizmit nga kriza. Të dhënat më të fundit nga Instituti i Statistikave (INSTAT) sa i përket sektorit të shërbimeve gjatë tremujorit të tretë të vitit tregojnë se, krahasuar me të njëjtën periudhë të një viti më parë, hoteleria ka pësuar një rënie të indikatorit të shitjeve neto prej thuajse 35% ndërsa baret dhe restorantet prej rreth 25%.
Për agjencitë e udhëtimit ndërkohë, rënia është edhe më drastike në rreth 57% krahasuar me një vit më parë. Kjo ecuri është reflektuar edhe në numrin e punonjësve si dhe në fondin e pagave, Statistikat afatshkurtra të Bankës së Shqipërisë për tremujorin e tretë të vitit tregojnë se indikatori i numrit të punonjësve gjatë sezonit të verës nëpër hotelet shqiptare ka qenë 27% më i ulët se një vit më parë, ndërsa ai i bareve dhe restoranteve rreth 24% më i ulët.
Shifra të ngjashme regjistrohen edhe për fondin e pagave, çka do të thotë se të punësuarit në sektorin e hoteleri turizmit janë ulur në mënyrë drastike këtë vit, si pasojë e pandemisë, ndërkohë që sezoni veror duket se ka bërë shumë pak për të zbutur dëmin.
Në sektorin e shërbimeve, dy aktivitete të tjera, si transporti dhe magazinimi bashkë me aktivitetet arkitekturore dhe inxhinierike, në një kohë që regjistrojnë një rënie mjaft të ndjeshme të volumit të shitjeve neto, janë ndikuar vetëm minimalisht në shkurtim stafi apo fondi pagash, tregojnë të dhënat më të fundit të Institutit të Statistikave në vendin tonë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.