Sfida në furnizimin e testeve të Covid-19, Roche: “Pavarësisht prodhimit rekord, nuk do të arrihet kërkesa”

Ekzekutivi i Roche, Severin Schwan, tha se pavarësisht dhjetra milionë teste të Covid- 19 që po zhvillon, nuk do të ketë mjaftueshëm këtë dimër, për shkak të rritjes së normës së infeksionit në hemisferën e veriut.  Gjiganti zviceran është drejt prodhimit të mbi 80 milionë testeve të shpejta të antigjenit në muaj deri në fund të këtij viti, së bashku me testin më të ngadaltë por më të saktë PCR, që ka dërguar në të gjithë botën që prej muajit Janar.

Por, kompania bën të ditur se pavarësisht kësaj norme gjigante të prodhimit,  nuk do të jetë e mundur  të arrihet kërkesa,  për shkak të sfidave në furnizime,  duke bërë që  autoritetet të vendosin prioritete tek burimet.  “Mund të shisnim shumë më shumë nëse do të kishim furnizimet”- tha Schwan, duke shtuar se janë sisteme tejet komplekse.

Kjo do të jetë gjithashtu dinamika për terapinë e koktejlit me antitrupa të Covid-19 që po zhvillon Roche, që mund të marrë miratim rregullator shumë shpejtë, sipas tij.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.