Sfidat e reformës në administratë, SIGMA: Qeveria duhet të përmirësojë monitorimin e borxhit vendor

Zbatimi i reformës në administratë, që ka në fokus ofrimin e shërbimeve cilësore për biznesin dhe individin, është një nga pesë prioritete për hapjen e negociatave.

Gjatë prezantimit të raportit për sfidat dhe prioritete e kësaj reforme nga SIGMA për 2017, zëvendës kryeministrja Senida Mesi u shpreh se në qendër të kësaj reforme është decentralzimi i shërbimeve dhe për ketë janë analizuar deh studiuar të gjithë indikatorët financiarë.

Në anën tjetër zëvendës ministri i Financave dhe Ekonomisë Erjon Luçi ka vlerësuar si pozitive hapat e hedhur deri tani në këtë drejtim dhe mbështetjen e ndërkombëtarëve.

Për Bashkimin Europian reforma në administratë vlerësohet si kyçe në mënyrë që ë mos ketë burokraci dhe sorollatje në ofrimin e shërbimeve jo vetëm për biznesit vendase por edhe ato të huaja.

Nga vetë SIGMA e gjithë ecuria e kësaj reforme është vlerësuar si pozitive por që për të shkuar drejt standardit europian duhet të plotësohen disa rekomandime kyçe në terma afat shkurtër dhe afat gjatë.

Një nga rekomandimet i cili duhet të plotësohet në një afat kohor 2 vjeçar nga Ministria e Financave dhe Ekonomisë ka të bëjë me përmirësimin e dokumentacionit për buxhetin vjetor duke përfshirë një pjesë të veçantë për problemet fiskale.

Një tjetër rekomandim po për Ministrinë e Financave ka të bëjë me përmirësimin e raportimeve sa i përket borxhit të qeverisjes vendore.

Brenda dy viteve të ardhshëm Ministria e Financave duhet të forcojë monitorimin e gjendjes financiare të ndërmarrjeve shtetërore të siguruara duke hartuar një raport financiar të konsoliduar të paktën një herë në vit.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.