SHBA aleatëve: Fonde për Ukrainën. Washingtoni kërkon më shumë mbështetje financiare për Kievin

Sekretarja amerikane e Thesarit Xhenet Jellen i bëri apel aleatëve të Shteteve të Bashkuara të Amerikës që të shtojnë ndihmën financiare për Ukrainën, duke shtuar se fondet e grumbulluara deri tani nuk do të jenë të mjaftueshme për nevojat afatshkurtra të vendit që aktualisht po lufton ende me Rusinë.

Në një deklaratë për mediat ajo theksoi se Ukraina ka nevojë për ndihmë të menjëhershme, dhe shtoi se qeveria e Kievit po vazhdon të funksionojë falë kurajos së anëtarëve të saj

Deri në momentin që do të rifillojë mbledhja e rregullt e taksave, Ukraina ka nevojë për fonde për të paguar ushtarët, të punësuarit dhe pensionistët por dhe për të nxitur ekonominë që të plotësojë kërkesat e qytetarëve, shtoi Jellen. Pra vendit i duhen para për riparimet e infrastrukturës dhe shërbimeve të domosdoshme.

Ndërkohë që Ukrainë do të ketë nevojë për një mbështetje shumë të madhe për rindërtimin dhe rimëkëmbjen, vendi duhet të bëjë një hap pas tjetrit.

Lufta ka shkaktuar mbylljen e pothuajse gjysmës së ekonomisë së vendit, dhe për këtë arsye Kievi kërkon financim të jashtëm të shpejtë për një vlerë prej 5 miliard dollarësh në muaj, për të përmbushur nevojat kryesore. Kjo shifër është caktuar pas bisedës së presidentit ukrainas Zelenski dhe përfaqësuesve të fondit monetar ndërkombëtar.

Bashkimi Europian do të propozojë të mërkurën një paketë të re kredish për Ukrainën për të siguruar likuiditet të menjëhershëm, së bashku me angazhimet për rindërtim afatgjatë. Ndërsa paketa afatshkurtër është ende duke u përcaktuar, mendohet se do të jetë e mjaftueshme për të mbuluar kërkesat për dy muaj.

Yellen u bëri thirrje aleatëve që të bashkohen me SHBA në rritjen e mbështetjes së tyre financiare për Ukrainën, ndërsa Senati amerikan është gati të miratojë një paketë të re prej 40 miliard dollarësh në ndihma ushtarake dhe financiare për Ukrainën.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.