SHBA, bankat në “festë” – FED s`ngel asnjë në klasë, aksionerët do marrin 100% të fitimit
Rezerva Federale ka publikuar raundin e dytë të Stress Testit të bankave në vend. Rezultati është mbresëlënës. 32 ndër 32 institucione huadhënëse e kaluan testin, dhe kjo nuk kishte ndodhur asnjëherë më parë.
Stress testet filluan të aplikoheshin që prej vitit 2008 për të shmangur një krizë të ngjashme me atë të po atij viti, që ishte më e madhja që prej depresionit të madh.
Nëpërmjet këtyre testeve, institucionet qendrore monetare testojnë gatishmërinë e bankave për të përballuar situata të krizave të rënda.
Aksionerët e bankave më të mëdha amerikane, tashmë kanë arsye të festojnë, për të parën herë në 10 vite.
Bankat do të fillojnë shpërndarjen më të madhe të dividentëve për aksionerët në këto 10 vite.
Rezerva Federale i ka dhënë dritën jeshilë të 32 institucioneve huadhënse që të shpërndajnë 100% të fitimeve gjatë 4 viteve të ardhshme.
Kaq kishin kërkuar vetë bankat. Një vit më parë, kjo normë fiksohej në 65%. Jo vetëm në shtetet e bashkuara, por edhe në Europë e më gjerë, stress testet janë kthyer që prej vitit 2010 në një detyrim ligjor.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.