SHBA drejt rregullave më të rrepta për udhëtarët e huaj – Gjyqtarët bllokojnë detyrimin e vaksinimit
Administrata e Biden do të shtrëngojë kërkesat e testimit për udhëtarët ndërkombëtarë që synojnë të hyjnë në Shtetet e Bashkuara, si për personat e vaksinuar ashtu edhe për të pavaksinuar, për shkak të përhapjes së variantit të ri Omicron. Qendrat për Kontrollin dhe Parandalimin e Sëmundjeve (CDC) thanë se po punojnë për të kërkuar që të gjithë udhëtarët ajror të testohen për Covid-19 brenda një dite përpara se të hipin në fluturim.
Aktualisht, ata që janë plotësisht të vaksinuar mund të dorëzojnë një test të kryer brenda tre ditëve nga hipja. CDC theksoi se aktualisht po punon për të ndryshuar Urdhrin aktual të Testimit Global për udhëtimet ndërsa mësojmë më shumë rreth variantit Omicron; një urdhër i rishikuar do të shkurtonte kohën e kërkuar të testimit për të gjithë udhëtarët ndërkombëtarë ajror në një ditë para nisjes për në Shtetet e Bashkuara.
Ndërkohë gjyqtarët federalë amerikanë kanë bllokuar përkohësisht detyrimin e vaksinës kundër Covid të nisur nga administrata Biden për disa kategori punëtorësh. Në pjesën e parë të vendimit, të dhënë nga një gjykatës federal i Luizianës, bllokohej kërkesa për vaksinime në të gjithë vendin për punonjësit shëndetësorë në spitale dhe qendra mjekësore që marrin fonde federale. Me këtë dënim, bllokimi i masës që një gjykatës i Misurit kishte vendosur të hënën për 10 shtete, shtrihet në të gjithë Shtetet e Bashkuara të Amerikës.
Prokurori i Përgjithshëm i Virxhinias Perëndimore, një nga shtetet e udhëhequra nga republikanët që apeloi kundër masave të Bidenit, e festoi vendimin si një fitore duke u shprehur të kënaqur që Gjykata ka dalë në mbrojtje të lirisë individuale të punëtorëve në sektorin e shëndetësisë. Vendimi tjetër, i lëshuar nga një gjykatës i Kentakit, është më pak i gjerë dhe bllokon zbatimin e detyrimit të vaksinimit për punonjësit e kompanive që kanë kontrata federale – që pritet të hyjë në fuqi më 8 dhjetor – në Kentaki, Ohajo dhe Tenesi.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.