SHBA-Gjermani, marrëveshje për “Nord Stream 2” / Rusia do të përballet me sanksione, nëse e përdor si mjet agresioni
Shtetet e Bashkuara të Amerikës dhe Gjermania do të marrin masa ndaj Rusisë nëse gazsjellësin “Nord Stream 2” e përdor si një mjet për të dëmtuar Ukraniën apo vendet e tjera të Europës Lindore. Marrëveshja është nënshkruar të mërkurën mes dy vendeve dhe vjen pas takimit që u zhvillua mes presidentit amerikan, Joe Biden dhe kancelares gjermane, Angela Merkel. Marrëveshja e përgatitur në muajt e fundit nga zyrtarët e lartë të dy vendeve do të zgjidhë një mosmarrëveshje të gjatë mbi gazsjellësin që kushtoi 11 miliardë dollarë dhe është rreth 98% i përfunduar. Ky gazsjellës do të transportojë gaz nën detin Balltik, nga rajoni i Arktikut në Rusi drejtpërdrejt në Gjermani. Zyrtarët amerikanë këmbëngulin se vazhdojnë ta kundërshtojnë tubacionin, por thonë se marrëveshja mes SHBA dhe Gjermanisë do të ulë mundësinë që Rusia ta përdorë energjinë si një armë kundër Ukrainës dhe vendeve të tjera të rajonit. Shtetet e Bashkuara shqetësohen se Moska mund ta ndërpresë furnizimin për Ukrainën ose shtetet e tjera si një formë agresioni dhe gjithashtu ka frikë se Ukrania do të humbasë tarifat e tranzitit për gazin rus që transportohet aktualisht. Por, marrëveshja do të shmangë, të paktën për momentin, rivendosjen e sanksioneve të mandatuara nga Kongresi amerikan kundër “Nord Stream 2” dhe shefit ekzekutiv të kompanisë. Presidenti Joe Biden hoqi dorë nga këto sanksione në muajin maj, për t’i thënë kohë palëve për të negociuar. Por, administrata e Biden gëzon të drejta për të përdorur sanksione rast pas rasti, në përputhje me ligjin e SHBA.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.