SHBA heq kufizimet për të huajt e vaksinuar – Pritet ringritja e turizmit, pas një mbylljeje prej 21 muajsh
Shtëpia e Bardhë njoftoi se do të heqë kufizimet e udhëtimit COVID -19 për vizitorët ndërkombëtarë të vaksinuar plotësisht duke filluar nga 8 Nëntori, duke i dhënë fund kufizimeve historike që kishin ndaluar hyrjen e shumicës së botës në Shtetet e Bashkuara për rreth 21 muaj.
Kufizimet e rrepta të udhëtimit i mbajtën miliona vizitorë jashtë Shteteve të Bashkuara nga Kina, Kanadaja, Meksika, India, Brazili, pjesa më e madhe e Europës e më tej, çka ndikoi në tkurrjen e turizmit amerikan dhe dëmtimin e ekonomisë.
Vendet aleate të SHBA kanë lobuar shumë në administratën Biden për të hequr këto rregullat. Zëdhënësi i Shtëpisë së Bardhë Kevin Munoz konfirmoi datën e 8 nëntorit në Twitter, duke shtuar se politika “udhëhiqet nga shëndeti publik, i rreptë dhe i qëndrueshëm”.
Kufizimet për qytetarët jo-amerikanë u vendosën së pari për udhëtarët me linja ajrore nga Kina në janar 2020 nga Presidenti i atëhershëm Donald Trump dhe më pas u shtrinë në dhjetëra vende të tjera. Kufizimet e udhëtarëve jo thelbësorë në kufijtë tokësorë me Meksikën dhe Kanadanë kanë qenë në fuqi që nga Marsi 2020 për të parandaluar përhapjen e COVID-19.
Aksionet e linjave ajrore amerikane, hoteleve dhe industrisë së lundrimit u rritën menjëherë pas këtij njoftimi. Trafiku ndërkombëtar i udhëtarëve me linjat ajrore në SHBA ra me 43% në gusht dhe trafiku i përgjithshëm ajror i udhëtarëve ra me 21% mbi nivelet para pandemisë, deklaroi Departamenti i Transportit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.