SHBA “kërcënon” me “Nord Stream 2” – DASH: Gazsjellësi nuk do të bëjë progres nëse Rusia sulmon Ukrainën
Gazsjellësi “Nord Stream 2” që transporton gazin nga Rusia në Gjermani, nuk do të bëjë progres nëse Moska sulmon Ukrainën, deklaroi Departamenti Amerikan i Shtetit. Ned Price, zëdhënës i Departamentit, pa u futur në detaje, tha se do të bashkëpunohet me Gjermaninë që të sigurohet se nuk bën progres. Projekti më kontrovers i energjisë në Europë, “Nord Stream 2” është projektuar për të dyfishuar sasinë e gazit që rrjedh nga Rusia në Gjermani, duke tejkaluar tranzitin tradicional të Ukrainës.
Projekti përballet me këmbëngulje brenda Bashkimit Europian, nga Shtetet e Bashkuara si dhe nga vetë Ukraina, për arsye se do të rrisë varësinë energjitike të Europës nga Rusia. Tubacioni do t’i mohojë gjithashtu Ukrainës tarifat e tranzitit, në një periudhë të ballafaqimit më të gjerë të Moskës me Perëndimin. Në Javën që kaloi, ministri i Jashtëm i Asutrisë, Alexander Schallenberg, tha se sanksionimi i gazësjellësit, që nuk është ende operues, nuk do të mjaftojë për të penguar Rusinë në sulmin ndaj Ukrainës. Javën e kaluar, Gjermania arriti një marrëveshje me SHBA, që i jep mundësinë “Nord Stream 2’ që të rihapet. Berlini është tërhequr ndaj disa propozimeve për sanksione më të ashpra, pëfshirë shkëputja e Rusisë nga sistemi i pagesave SWIFT.
Ditën e Martë, kreu i institutit Ifo për hulumtime ekonomike në Gjermani, Clemens Fuest, tha se ndërsa është e mundur për të vendosur rajonin nën presion, Europa mund të drejtohet për gaz natyror tek vende të tjera, duke bërë që Rusia të humbasë treg. Gjermania, së bashku me Francën, janë mbështetëse të bisedimeve për paqe mes ukrainës dhe forcave të mbështetura nga Rusia.
Por gjermania ka gjithashtu lidhjet më të forta ekonomike me Moskën, se çdo fuqi tjetër perëndimore, duke blerë thuajse gjysmën e gazit natyror nga Rusia. Kjo i ka dhënë gjithashtu një incentivë të fortë Berlinit që të mbajë të qëndrueshme marrëdhënien me Moskën. Kriza përbën provimin e parë të madh të jashtëm për kancelarin Olaf Scholz, që mori detyrën në vitin e kaluar, pas 16 vite të lidershimit të Angela Merkel.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.