SHBA krijon 850 mijë vende pune në qershor – Punësimi, rreth 6.8 milionë vende poshtë periudhës përpara pandemisë

Ekonomia amerikane ka krijuar 850 mijë vende pune, gjatë muajit qershor, ndërkohë që kompanitë po punësojnë staf me shpejtësi. Presidenti amerikan, Joe Biden, e përshëndeti rritjen e punësimit, duke thënë se është një moment historik.

Kompanitë amerikane punësuan numrin më të lartë të punëtorëve në 10 muajt e fundit, gjatë qershorit, duke rritur pagat dhe duke ofruar incentiva për të joshur miliona amerikanë të papunë. Analistët shprehen se kjo është një shenjë paraprake se mungesa e fuqisë punëtore po fillon të zbehet. Të dhënat e Departamentit të Punës treguan se gjatë muajit të kaluar u futën në tregun e punës edhe 151,000 persona të rinj. Përshpejtimi i hapit të punësimit sugjeron se, ekonomia më e madhe në botë e ka mbyllur tremujorin e dytë të vitit në performancë shumë të mirë, pas rihapjes dhe programeve të vaksinimit. Vëzhgimi tregoi se, punësimi me përjashtim të sektorit bujqësor u rrit me 850,000 njësi gjatë qershorit.

Ekonomia amerikane krijoi 15 mijë më shumë vende pune krahasuar me prillin dhe majin. Megjithatë, punësimi është rreth 6.8 milionë vende pune poshtë kulmit të arritur në shkurt të vitit 2020, periudhë përpara shpërthimit të pandemisë. Ekonomistët e anketuar nga Reuters, parashikonin se do të krijoheshin 700 mijë vende të reja pune. Gratë, që u goditën më shumë nga pandemia, morën rreth gjysmën e vendeve të punës të krijuara gjatë qershorit. Edhe presidenti amerikan, Joe Biden, e përshëndeti rritjen e punësimit.

“Është një progres historik, pasi e kemi nxjerrë ekonominë nga kriza më e keqe në 100 vitet e fundit. Ne kemi bërë një progres dramatik me programin e vaksinimit, apo me elementet e tjerë të “Planit Amerikan të Shpëtimit”, deklaroi Biden. Industria e kohës së lirë dhe e mikpritjes krijoi 343 mijë vende të reja pune, apo 40% të totalit. Më shumë se 150 milionë persona në SHBA janë imunizuar plotësisht ndaj Covid-19, që çoi në heqjen e kufizimeve dhe në rihapjen e ekonomisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.