SHBA, kriteret për bursa studimi pasuniversitare dhe për doktoraturë. Afatet për aplikim, dokumentet dhe degët ku mund të studioni

Ambasada Amerikane, përmes një njoftimi ka publikuar programin e bursave për studentët e huaj. Bëhet fjalë për programin e bursave për studime pasuniversitare, si dhe për bursa doktoraturë në Shtetet e Bashkuara të Amerikës.

Në njoftim thuhet se Ambasada e Shteteve të Bashkuara të Amerikës pranon aplikimet për vitin akademik 2018-2019 për programin Fulbright për studentë të huaj.

“Programi Fulbright u jep mundësi profesionistëve të rinj dhe studentëve të diplomuar për të vazhduar studimet pas-universitare në Shtetet e Bashkuara. Bursat u akordohen kandidatëve që shfaqin më së miri përkushtim në detyrë si në sektorin publik dhe atë privat, si edhe potencial për të sjellë një qasje pozitive në të ardhmen e Shqipërisë, në bazë të një niveli të lartë konkurrence”.

Fushat e Studimit

Sipas Ambasadës së SHBA, degët për studime pasuniversitare janë:

Shkenca natyrore dhe sociale, Agrikulturë, Inxhinieri, Biznes, Ekonomik, Administrim Publik, Administrim Shëndetësor, Letërsi dhe gjuhësi, Psikologji, Bibliotekonomi, Kërkime arsimore,  Juridik, Teatër/Balet, Arsim, Gazetari.

Kjo bursë është e vlefshme për një ose dy vite akademike në një universitet në Shtetet e Bashkuara për të përfituar një diplomë master. Pjesëtarë të familjes mund të lejohen të shoqërojnë kandidatin sipas rastit dhe plotësimit të kritereve. Kandidatët janë të detyruar të kthehen në Shqipëri për të paktën 2 vjet pas përfundimit të programit.

Kërkesat për kualifikim

Kërkesat që duhen dorëzuar për kualifikim:

-Diplomë universitare me të paktën 4 vite të plota studimi (ose 3+1, 3+2 sipas procesit te Bolonjës);

-Minimumi 2 vite eksperiencë profesionale në fushën e studimit;

-Aftësi të dukshme drejtuese

-Nivel i përshtatshëm i gjuhës angleze (580 ose me shumë në provimin e TOEFL) – dhënia e provimit të TOEFL-it nuk është detyrim në momentin e aplikimit;

-Kombësi shqiptare

-Limiti i moshës: 40

“Personat që janë aktualisht të regjistruar në programet e studimit ne Shtetet e Bashkuara, të punësuar, të martuar me shtetas amerikanë, ose që kanë aplikuar për të emigruar, kanë kërkuar azil në shtet tjetër nuk janë të ligjshëm për të aplikuar. Bursa e programit Fulbright garanton shkollimin, pagesë mujore për jetesë, libra dhe mjete shkollore, udhëtim vajtje ardhje në institucionin mikpritës. Bursa e programit Fulbright nuk rinovohet”.

Procedura e aplikimit

Forma e aplikimit për programin Fulbright duhet plotësuar në mënyrë elektronike, këtu. Aplikimet duhen dërguar jo më vonë se data 15 Qershor 2017. Aplikimi i plotë përfshin:

-Formën e aplikimit (gjeneruar nga sistemi online)

-Kopje të noterizuar të diplomës universitare dhe listës së notave nga të gjitha institucionet akademike e ndjekura më parë (një kopje)

-Tre letra reference

-Curriculum Vitae

-Letër nga punëdhënësi që konfirmon punësimin

-Kopje e pasaportës

-Kopje të certifikatave nga kurse të kryera më parë (të vlefshme për fushën e studimit)

“Pasi të plotësoni aplikimin online ju duhet ta printoni dhe ta postoni bashkë me dokumentet e tjera plotësuese në adresën e mëposhtme jo më vonë se data 15 Qershor 2017. Për informacion të mëtejshëm kontaktoni: Zyra e Marrëdhënieve me Publikun, Ambasada Amerikane, Tiranë 04 224-7285, email [email protected] ose faqen tonë në Facebook. Kujdes: Aplikimet që do të dorëzohen ose postohen pas datës 15 Qershor 2017, apo të dërgohen si dokument Google ose We tranfer  nuk do të merren në konsideratë!”

PËR PROGRAMET E STUDIMIT PËR DOKTORATURË

Ambasada e Shteteve të Bashkuara të Amerikës pranon aplikime për vitin akademik 2018-2019 për Programin Fulbright për Studiues të Huaj. Programi Fulbright u jep mundësi pedagogëve dhe kandidatëve që kanë kryer doktoraturën ose janë në proces, të bëjnë kërkime dhe/ose të japin mësim në një universitet në Shtetet e Bashkuara.

“Bursat u jepen kandidatëve që shfaqin më së miri përkushtimin në detyrë si në sektorin publik dhe atë privat, si edhe potencial për të sjellë një qasje pozitive në të ardhmen e Shqipërisë në bazë të konkurrimit”.

Fushat e studimit

Sipas Ambasadës së SHBA, degët për studime doktorature janë:

Dramë, Studime fetare, Punë sociale, Kimi, Letërsi/Gjuhësi, Komunikim, Juridik, Sociologji, Gazetari, Bibliotekonomi, Shkenca kompjuterike, Histori (jo amerikane), Shëndet publik, Shkrim krijues, Linguistikë, Letërsi amerikane, Administrim publik, Shkenca informative, Shkenca mjedisore, Administrim Biznesi, TEFL/Gjuhësi e aplikuar. Bursat zakonisht zgjasin tre deri në gjashtë muaj në universitetet në Shtetet e Bashkuara.

Pjesëtarë të familjes mund të lejohen të shoqërojnë kandidatin sipas rastit dhe plotësimit të kritereve. Kandidatët janë të detyruar të kthehen në Shqipëri për të paktën 2 vjet në përfundim të Programit.

Kërkesat për kualifikim

-Gradë doktorature ose kandidatë që janë duke e kryer doktoraturën;

-Minimumi 5 vjet eksperiencë në mësimdhënie dhe/ose eksperience në fushat kërkimore në një universitet shqiptar;

-Nivel i përshtatshëm i gjuhës angleze në përputhje me projektin që do të studiohet në Shtetet e Bashkuara (minimumi 580 pikë në provimin e TOEFL) – dhënia e provimit të TOEFL-it nuk është detyrim në momentin e aplikimit;

-Aftësi drejtuese dhe kërkimore të shprehura, dhe potencial për zhvillim të mëtejshëm në profesionin përkatës;

-Kombësi shqiptare dhe punësim në Shqipëri;

-Limiti i moshës: 55

“Personat që janë aktualisht të regjistruar në programet e studimit ne Shtetet e Bashkuara, me përvoja të mëparshme studimi në Amerikë, fitues të një burse Fulbright në pesë vitet e fundit, të punësuar, të martuar me shtetas amerikanë, ose që kanë aplikuar për të emigruar, kanë kërkuar azil në shtet tjetër nuk janë të ligjshëm për të aplikuar.Bursa e programit Fulbright garanton shkollimin, pagesë mujore për jetesë, libra dhe mjete shkollore, udhëtim vajtje ardhje në institucionin pritës. Bursa e programit Fulbright nuk rinovohet.

Procedura e aplikimit

-Forma e aplikimit për programin Fulbright për studiues të huaj duhet plotësuar në mënyrë elektronike, këtu.

-Aplikimet duhen dërguar jo më vonë se data 15 Qershor 2017

-Aplikimi i plotë përfshin:

-Formën e aplikimit

-Deklaratë të detajuar të aktivitetit të propozuar

-CV të detajuar

-Tre referenca

-Kopje të noterizuara dhe të skanuara të diplomave (Univeristetare, Master, Doktoraturë)

-Certifikatë të tjera të marra (të vlefshme për fushën e studimit)

-Letër nga punëdhënësi që konfirmon punësimin

-Ftesa ose konfirmim pranimi nga institucioni Amerikan (jo e detyruar)

-Pasi të plotësoni aplikimin online ju duhet ta printoni dhe ta postoni bashkë me dokumentat e tjera plotësuese në adresën e mëposhtme jo më vonë se data 15 Qershor 2017.

Për informacion të mëtejshëm kontaktoni: Zyra e Marrëdhënieve me Publikun, Ambasada Amerikane, Tiranë Tel: 04 224-7285, email [email protected] ose faqen tonë në Facebook. Kujdes: Aplikimet që do të dorëzohen ose postohen pas datës 15 Qershor 2017, apo të dërgohen si dokument Google ose We tranfer  nuk do të merren në konsideratë!

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.