SHBA mbështet plotësisht grupin luftarak të NATO-s në Bullgari!

Shtetet e Bashkuara kanë rënë dakord të ofrojnë një kompani këmbësorie të mekanizuar Stryker për grupin luftarak të Bullgarisë nën përpjekjet e NATO-s për të forcuar krahun e saj lindor pas pushtimit të Ukrainës nga Rusia, tha të shtunën kryeministri bullgar Kiril Petkov.

“SHBA ranë dakord të sigurojnë një kompani Stryker,” tha ai në një konferencë për shtyp me Sekretarin e Mbrojtjes së SHBA, Lloyd Austin. “Kjo është një shenjë e fortë për të gjithë aleatët tanë në NATO.”

Bullgaria, dikur aleati më i ngushtë i Moskës gjatë epokës së Luftës së Ftohtë, por një vend anëtar i NATO-s dhe Bashkimit Europian, po krijon një grup beteje prej deri në 1,000 trupa nën komandën operacionale të Komandantit Suprem të Aleatëve të NATO-s për Evropë. Grupi i betejës pritet të presë gjithashtu trupa nga vendet e tjera aleate.

“Doja të nënvizoja rëndësinë e njoftimit se Bullgaria ka krijuar dhe po udhëheq një grup beteje shumëkombëshe të NATO-s. Është një hap i rëndësishëm dhe ne e mbështesim plotësisht,” tha Austin.

Petkov tha se Bullgaria do të vazhdojë të dërgojë ndihma humanitare në Ukrainë dhe të pranojë refugjatë ukrainas nga lufta, por nuk po shqyrton dërgimin e ndonjë arme në Kiev për momentin pasi vendi i tij në Detin e Zi ishte shumë afër konfliktit. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.