SHBA-Meksikë, ok për “Nafta” – Arrihet marrëveshja, mungon vetëm Kanadaja
Shtetet e Bashkuara të Amerikës dhe Meksika arritën më në fund marrëveshjen për të zhbllokuar paktin e tregtisë së lirë së Amerikës së Veriut, e njohur ndryshe si `Nafta`. Ky zhvillim i fundit shton ndjeshëm presionin ndaj Kanadasë për t`u dakordësuar me kushtet e reja të paktit. Aksionet e kompanive të automjeteve por edhe S&P 500 si dhe Nasdaq u regjistruan në rritje të ndjeshme pas lajmit, rrjedhojë e pritshmërive të larta se Kanadaja do t`i bashkohet paktit, duke ulur kështu edhe tensionet e kohëve të fundit.
Këto tensione u ngritën që kur Presidenti Trump kërcënoi se do të hiqte dorë nga marrëveshja e 1994-ës mes palëve. Nuk ka ende asgjë publike mbi detajet e marrëveshjes së re “NAFTA”.
Pavarësisht momentit të favorshëm, Trump nuk harroi të lëshonte mesazhe kërcënuese, duke deklaruar se mund të vendosë tarifa mbi makinat e importuara nga Kanadaja në rast se vendi nuk do t`i bashkohet fqinjëve në këtë marrëveshje, Kryeministri kanadez, Justin Trudeau dhe Donald Trump e diskutuan çështjen në një lidhje telefonike mes tyre të Hënën, dhe u dakordësuar që të vijojnë me bisedimet. Gjasat janë që marrëveshja e re mes tre vendeve të nënshkruhet brenda këtij viti.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.