SHBA ndalon marrëveshjen 117 miliardë dollarëshe – Trump e bllokon për arsye sigurie

Presidenti i Shteteve të Bashkuara Donald Trump lëshoi ditën e hënë një urdhër ekzekutiv që ndalon blerjen e gjigandit amerikan të teknologjisë, Qualcomm, nga kompania me bazë në Singapor Broadcom. Në këtë mënyrë, marrëveshja me vlerë 117 miliardë dollarë është hedhur poshtë mbi bazën se ngre rreziqe për sigurinë kombëtare.

“Ka arsye me bazë të fortë që më bëjnë të besoj se Broadcom Ltd, duke blerë Qualcomm mund të marrë masa që kërcënojnë të paralizojnë sigurinë kombëtare të Shteteve të Bashkuara”, shkruan Trump në urdhrin e lëshuar në mbrëmje.

Ky vendim shkon në linjë me qëndrimin e ashpër të administratës Trump ndaj blerjes nga kompani të huaja të firmave amerikane teknologjike. Janë të paktën 10 marrëveshje që janë ndaluar, apo janë braktisur pasi administrata ka shfaqur shqetësimet e saj.

Vetë kompania Broadcom është shprehur në një deklaratë zyrtare se është forcërisht kundër mendimit se blerja e Qualcomm ngre shqetësime sigurie.

Urdhri shënon një lëvizje të paprecendetë nga Shtëpia e Bardhë në ndalimin e një oferte agresive për një kompani. Kjo pasi, Broadcom nuk kishte ende një marrëveshje për blerjen, por po luftonte për të fituar mbështetje brenda aksionerëve të kompanisë amerikane.

Nëse kjo marrëveshje do të ishte finalizuar, do të ishte blerja më e madhe në fushën e teknologjisë ndonjëherë. Marrëveshja do të ishte gjithashtu e treta për nga vlera në të gjithë fushat.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.