SHBA paralajmëron: Rusia mund të pushtojë Ukrainën pas dështimit të bisedimeve!
Zyrtarët amerikanë paralajmëruan se një përpjekje ruse është duke u zhvilluar për të krijuar një pretekst për trupat e saj për të pushtuar Ukrainën. Paralajmërimi erdhi pasi faqet e internetit të qeverisë ukrainase u shkatërruan pas një sulmi kibernetik “masiv”. Shtatë faqet e internetit të ministrisë u shkatërruan, si dhe faqet e internetit të kabinetit, thesarit, shërbimit të urgjencës dhe shërbimeve shtetërore.
Një mesazh në faqen e internetit paralajmëroi ukrainasit që të “pritnin më të keqen”. Zëdhënësi i Punëve të Jashtme të Ukrainës, Oleg Nikolenko tha se hetimet ishin “në vazhdimësi”, por se shërbimet e sigurisë kishin marrë “indikacione paraprake” që sugjeronin se pas sulmit qëndronin hakerat e lidhur me shërbimet sekrete ruse.
Zyrtarët amerikanë dhe perëndimorë kanë qenë të shqetësuar për një pushtim të mundshëm rus të Ukrainës prej javësh, pasi dhjetëra mijëra trupa ruse janë mbledhur në kufirin e vendit fqinj. Zëdhënësi i Pentagonit, John Kirby e përshkroi si shumë të besueshëm faktin që Rusia mund ta akuzojë Ukrainën se po përgatit një sulm kundër forcave të mbështetura nga Rusia.
Këshilltari për sigurinë kombëtare të Shtëpisë së Bardhë, Jake Sullivan, tha të enjten se komuniteti i inteligjencës amerikane nuk ka bërë një vlerësim se rusët kanë vendosur përfundimisht të ndërmarrin një kurs veprimi ushtarak. Por Sullivan tha se Rusia po krijon bazat për të pushtuar nën pretendime të rreme nëse Putin vendos të shkojë në atë rrugë.
Paralajmërimi i SHBA erdhi pas negociatave midis Rusisë dhe SHBA-së në Europë që synonin ndalimin e krizës në përshkallëzim. Rusët kanë kërkuar që NATO të mos zgjerohet për të përfshirë Ukrainën ose shtete të tjera ish-sovjetike, por SHBA i ka quajtur kërkesa të tilla si jo-nismëtare.
SHBA-ja ka thënë se është e gatshme të negociojë me Moskën për vendosjet e mundshme të ardhshme të raketave sulmuese në Ukrainë dhe vendosjen e kufijve për stërvitjet ushtarake të SHBA-së dhe NATO-s në Europën Lindore.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.