SHBA “zhgënjen” aleatët – Europa premton kundërpërgjigje nëpërmjet OBT për tarifat amerikane
Komisioni Europian ka reaguar ashpër ndaj lajmeve se Shtetet e Bashkuara do të vendosin tarifa mbi çelikun dhe aluminin ndaj Kanadasë, Meksikës dhe Bashkimit Europian.
Sekretari i Tregtisë, Wibur Ross, lajmëroi këtë javë se tarifat në 25% për importet e çelikut dhe 10% për aluminin, do të hyjnë në efekt nisur nga e Premtja.
“Bashkimi Europian mendon se këto tarifa të njëanshme nga Shtetet e Bashkuara janë të pajustifikuara dhe bien në kontradiktë me rregullat e Organizatës Botërore të Tregtisë. Kjo lëvizje nuk mund të quhet gjë tjetër përveç se proteksionizëm”, publikoi në Twitter Komisioni Europian, menjëherë pas lajmërimit.
Në një lajmërim për shtyp, presidenti i Komisionit, Jean-Claude Juncker, tha se unioni është goditur po aq sa Shtetet e Bashkuara nga mbikapaciteti në sektorin e çelikut.
Ai shtoi se Bashkimi Europian nuk ka rrugëzgjidhje tjetër përveç se të vazhdojë me sfidat ligjore nëpërmjet Organizatës Botërore të Tregtisë.
“Do të mbrojmë interesat e unionit nëpërmjet ligjeve ndërkombëtare të tregtisë”, tha Juncker.
Zyrtarët në Mbretërinë e Bashkuar deklaruan gjithashtu se janë tejet të zhgënjyer nga vendimi i Shteteve të Bashkuara, pasi të dy janë aleatë të ngushtë dhe duhet të përjashtohen në mënyrë të përhershme nga tarifat.
Përpara lajmërimit të penaliteteve, Kancelarja gjermane Angela Merkel tha se tarifat nuk janë në përputhje me rregullat e Organizatës Botërore të Tregtisë dhe se Europa duhet të përgjigjet me mprehtësi dhe vendosmëri.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.