Shefi ekzekutiv i DSM jep paralajmërimin: ‘Municionet’ e Europës të pamjaftueshme për t’u marrë me një krizë tjetër
Kriza e fundit financiare e ka lënë Europën me shumë pak ‘burime’ për të kapërcyer një krizë tjetër ekonomike. Paralajmërimi ka ardhur nga shefi ekzekutiv i kompanisë holandeze shumëkombëshe DSM, Fejke Sijbesma në Forumin Ekonomik Botëror në Davos.
Fondi Monetar Ndërkombëtar paralajmëroi të hënën për rreziqet ekonomike në vendet e Eurozonës, që vijnë posaçërisht nga Gjermania dhe Italia. Megjithatë, ka shqetësime se kriza e borxhit sovran dhe programi i blerjes së bonove të mëvonshme të Bankës Qendrore Europiane kanë lënë rajonin me pak mundësi për të menaxhuar një krizë tjetër ekonomike të mundshme.
“Nëse ne me të vërtetë do të shkojmë në një ngadalësim ekonomik në Europë, mendoj se bankat qendrore dhe qeveritë, nga pikëpamja monetare, nuk kanë ‘municion’ për ta kapërcyer atë”, tha Sijbesma.
Pas krizës së borxhit të vitit 2011, BQE filloi një program blerjeje të aseteve për të rritur inflacionin dhe për të rindërtuar pozitat e euros, ndërsa mbajti normat e interesit të ulëta. Megjithëse programi i blerjes së bonove përfundoi në fillim të këtij viti, normat e interesit do të mbeten të ulëta në pjesën më të madhe të këtij viti dhe do të rriten gradualisht.
Zyra e statistikave europiane, Eurostat, konfirmoi muajin e kaluar, se ekonomia regjistroi një rritje me ritmin më të ngadaltë në katër vjet në tremujorin e tretë të 2018. Në raportin e saj të fundit të ekonomisë, FMN paralajmëroi se pasiguria mbi largimin e Britanisë së Madhe nga BE është gjithashtu një rrezik për ekonominë europiane.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.