Shefi OBSH paralajmëron: Anuloni eventet e Krishtlindjes sesa të hidhëroheni më vonë!
Kreu i Organizatës Botërore të Shëndetësisë (OBSH) rekomandoi të hënën njerëzit të anulojnë tubimet e festave pasi Omicron vazhdon të përhapet. Duke folur në një konferencë shtypi në Gjenevë, ai tha se ‘një ngjarje e anuluar është më e mirë se një jetë e anuluar’.
Shefi i OBSH-së tregoi ‘prova të qëndrueshme’ se varianti i fundit i shqetësimit, Omicron, po përhapet “dukshëm më shpejt” se varianti Delta. Të dhënat sugjerojnë se transmetimi në komunitet i Omicron ka një kohë dyfishimi midis 1.5 dhe 3 ditësh.
Shkencëtari kryesor i OBSH-së paralajmëroi gjithashtu se është shumë herët për të arritur në përfundimin se Omicron është një variant më i butë dhe theksoi se studimet paraprake sugjerojnë se është më rezistent ndaj vaksinave që përdoren aktualisht për të luftuar pandeminë.
Provat aktuale tregojnë se ka më shumë gjasa që njerëzit që janë vaksinuar ose janë shëruar nga COVID-19 mund të infektohen ose riinfektohen nga Omicron. Për momentin, pak vende kanë vendosur masa kufizuese gjatë periudhës festive të vitit 2020 për të limituar transmetimin.
Përfundimi i pandemisë në vitin 2022 mund të bëhet, por së pari bota “duhet t’i japë fund pabarazisë duke siguruar që 70% e popullsisë së çdo vendi të vaksinohet deri në mes të vitit të ardhshëm”. Shefi i OBSH shprehu keqardhjen që disa vende po përdorin doza vaksinash për t’u dhënë përforcues fëmijëve kur popullsia e moshuar është e vendeve të tjera nuk e kanë marrë ende dozën e tyre të parë.
Sipas të dhënave nga Our World in Data, 48% e popullsisë së botës është vaksinuar plotësisht, por vendet me të ardhura të larta dhe ato me të ardhura të mesme ishin në gjendje të lëviznin me një ritëm shumë më të shpejtë duke inokuluar plotësisht rreth 70% të popullsisë së tyre në krahasim me normat e 33% për vendet me të ardhura të ulëta të mesme dhe vetëm 3.7% për vendet me të ardhura të ulëta.
Shefi i OBSH u shpreh se vetëm 8.4% e popullsisë në kontinentin afrikan është aktualisht plotësisht e vaksinuar dhe më shumë se 5.3 milionë njerëz kanë humbur jetën nga pandemia, 3.3 milionë në vitin 2021, më shumë vdekje sesa nga HIV, malaria dhe tuberkulozi të kombinuara në vitin 2020. Rreth 50,000 jetë humbasin ende nga virusi çdo javë.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.