Shëndetësia e harruar, Basha: Shqipëria me numrin më të vogël të mjekëve, qytetarët pa shërbim shëndetësor

Në Shqipëri, sistemi shëndetësor publik vuan nga mungesa e personelit shëndetësor, investimeve në infrastrukturë dhe pajisjeve mjekësore. Nëpërmjet një postimi në rrjetet sociale, kreu i Partisë Demokratike Lulzim Basha, ka denoncuar lënien pas dore të këtij sektori jetik. Sipas tij, mungesa e mbështetjes ka larguar me mijëra mjekë dhe infermierë nga vendi, duke bërë që Shqipëria të ketë numrin më të ulët të mjekëve për banorë në rajon.

Basha i referohet të dhënave të Observatorit Global të Shëndetit, sipas të cilit, Shqipëria ka numrin më të ulët të mjekëve për banorë në rajon, 1.2 mjekë për 1000 banorë. Ndërkohë që Greqia ka 6.2 mjekë për 1000 banorë, Maqedonia 2.8, Mali i Zi 2.3, Serbia 2.4 dhe Bosnja 1.8. Ndërkohë, kreu opozitar nënvizon se, pas 2 mandatesh të qeverisjes së Ramës, mjekët shqiptarë paguhen më pak se në çdo vend të rajonit apo Europës. Sipas një studimi të Institutit Ndërkombëtar për Studime Ekonomike në Vjenë, mjekët në Shqipëri paguhen mesatarisht 435 euro, që është dhe paga më e ulët në rajon.Mjekët paguhen më shumë në Bosnjë (901 euro) dhe Mal të Zi (833 euro), ndërsa në Serbi e Maqedoni me mbi 700 euro. Basha thekson se me ardhjen në pushtet do të rriten pagat e mjekëve deri në 1200 euro dhe 700 euro për infermierët.

Arbër Hitaj / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.