Shëndetësia në “krizë”, Basha: Eksod masiv i mjekëve. Spitalet s’kanë barna dhe pajisje

Pas ekonomisë sektori i shëndetësisë vijon të mbetet nga më problematikët sipas opozitës. Në një postim që ka bërë në Facebook kreu i Partisë Demokratike Lulzim Basha rendit një sërë problematikash me të cilat përballen pacientët shqiptarë.

Sipas Bashës nëse në buxhetin e 2018 nuk do të planifikoheshin 40 milionë euro për koncesionarët, ato do të mjaftonin për të mbuluar nevojat me pajisje dhe barna për të gjithë spitalet e Shqipërisë.

Referuar premtimit të qeverisë shqiptare për rimbursimin e fishave për fëmijët me diabet, Basha shprehet se është një premtim që nuk po mbahet e që qytetarët do të duhet ti blejnë vetë.

“Janari erdhi, por as Damiana, as 1500 fëmijët e tjerë nuk do të rimbursohen, sepse qeveria e Edi Ramës nuk ka miratuar akoma Listën e Barnave të Rimbursueshme për vitin 2017. 1500 fëmijët e sëmurë me diabet do të vazhdojnë të blejnë 100 mijë lekë çdo muaj fishat e diabetit, sepse klanet e tregut miliarder farmaceutik, klientë të Edi Ramës, nuk kanë rënë akoma dakord si do të ndajnë fitimet nga Lista,” shkruan Basha.

Në statusin e tij Basha i referohet edhe zgjerimit të listës së barnave të rimbursueshme me 30 barna të reja.

“Fëmijët me diabet nuk janë të vetmit që janë mashtruar nga Edi Rama. Ai bëri fushatë elektorale me premtimin se mijëra shqiptarë do të përfitonin nga zgjerimi i Listës me 30 ilaçe të reja me fokus tek sëmundjet me përhapje të gjerë si ato të zemrës dhe të veshkave. Është e qartë se edhe këta mijëra shqiptarë janë peng i pazareve të pambyllura të klientëve të Edi Ramës me Listën e Barnave të Rimbursueshme”, shkruan Basha në Facebook.

Ky vit ka nisur keq edhe për spitalet dhe qendrat shëndetësore. Siç e përshkruajnë mjekët dhe pacientët, gjendja është skandaloze, pa kushte, pa barna dhe pa kura të mjaftueshme.

Kjo situatë skandaloze në shëndetësi ka sjellë eksodin masiv të mjekëve dhe infermierëve.

Në 3 vjet janë larguar nga vendi rreth 530 mjekë dhe 848 infermierë, të cilët po kërkojnë jashtë vendit kushte më të mira pune dhe paga më të larta, vijon Basha në statusin e tij në Facebook.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.