“Shëndeti” i bankave – Në përmirësim gjatë pesë viteve të fundit
Gjatë pesë viteve të fundit, indeksi i shëndetit bankar në vend është në përmirësim. Ky tregues llogaritet nga Banka e Shqipërisë dhe përfaqëson një vlerësim të përgjithshëm të kushteve bazë dhe faktorëve të rrezikut që ndikojnë në stabilitetin e sektorit bankar dhe atë të bankave individuale.
Indeksi përbëhet nga pesë tregues: kapitali, cilësia e aktiveve, përfitueshmëria, likuiditeti dhe eficienca. Në fund të vitit 2018, indeksi i shëndetit bankar rezultoi njësoj si një vit më parë, në nivelin 0.46.
Treguesit përbërës të indeksit, të cilët kanë shfaqur shëndet më të mirë vitin e fundit janë kapitalizimi, cilësia e aktiveve dhe likuiditeti. Si peshë, kontributin kryesor në rrezik vijon ta japë cilësia e aktiveve. Megjithatë, rënia e konsiderueshme e raportit të kredive me probleme, ka ndikuar në rënien e kontributit të këtij treguesi në rrezik gjatë vitit të kaluar. Kontribut pozitiv në indeksin e shëndetit bankar dhanë edhe niveli i kënaqshëm i likuiditetit dhe zgjerimi i konsiderueshëm i mjaftueshmërisë së kapitalit.
Dy treguesit e tjerë, përfitueshmëria dhe eficienca, janë rritur lehtë, çka nënkupton një rrezik më të lartë prej tyre. Rënia e fitimit të bankave ka dhënë ndikimin kryesor në rritjen e rrezikut që buron nga treguesi i përfitueshmërisë, ndërsa rritja e raportit “shpenzime të veprimtarisë ndaj të ardhurave” ka kontribuuar në rritjen e rrezikut që buron nga treguesi i eficiencës.
Sipas përmasave, bankat më të mëdha kanë vlerë më të ulët të indeksit, që nënkupton një gjendje më të shëndetshme dhe rrezik më të ulët. Në këtë grup përfshihen katër bankat që kanë më shumë se 7% pjesë tregu, e matur sipas totalit të aktiveve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.