Shërbim “Fast Track” në hipoteka! Gjonaj: 9 veprime në 24 orë, përfitojnë qytetarët, bankat, ndërtuesit

Ministrja e Drejtësisë, Etilda Gjonaj, ka marrë pjesë në ceremoninë e inaugurimit të shërbimit më të fundit në hipoteka. Quhet “Fast Track”, linjë e shpejtë, dhe parashikon sigurimin brenda 24 orëve të 9 veprimeve kryesore që kanë të bëjnë me pronat.

Bëhet fjalë për 9 shërbimet më të kërkuara nga qytetarët e bizneset, që përbëjnë edhe pjesën më të madhe të veprimeve kadastrale. Gjonaj tha se “Fast Track” do përmirësojë shërbimet për qytetarët, për bankat, ndërtuesit, noterët, përmbaruesit e çdo subjekt që operon me pronat.  Ndërkohë që do të jetë një tjetër element sigurie për të shmangur korrupsionin në sportelet e hipotekave.

Kreu i Zyrës Qendrore të Regjistrimit të Pasurive të Paluajtshme Valdrin Pjetri tha se përmirësimi i këtyre shërbimeve ishte i domosdoshëm, pasi vetëm në vitin 2017 hipoteka ka kryer rreth 360 mijë veprime me pronat. “Fast Track” bën të mundur marrjen brenda 24 orëve nga konfirmimi i pagesës të 9 prej 51 shërbimeve kryesore kadastrale.

Shërbimi i ri u përshëndet edhe nga përfaqësuesit e bizneseve, sipas të cilëve, shërbimi i ri do u kursejë kohë, energji e kosto financiare.

Gjatë ceremonisë Ministrja Gjonaj u ndal dhe te dy projektligjet në pritjet të votimin në Kuvend që parashikojnë bashkimin e institucioneve të pronës dhe përfundimin e proceseve tranzitore që zgjasin prej dekadash si ndarja e tokës bujqësore, legalizimet apo kompensimi i pronarëve.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.