Shërbime për të moshuarit – Veliaj: Krijojmë rezervat e qytetit dhe një qendër shërbimesh
Bashkia e Tiranës do të krijojë rezervat e qytetit për të përballuar çdo rast emergjence që vjen si rrjedhojë e kushteve atmosferike por jo vetëm, si dhe do të vërë në dispozicion një qendër që ofron shërbime të plota për të moshuarit.
Kryebashkiaku Erion Veliaj, pjesëmarrës në Forumin e të Moshuarve, bëri me dije se kaq sa është bërë për këtë kategori është e pamjaftueshme dhe vëmendja do të rritet edhe më tej.
“Futja e pensionit social besoj se është e jashtëzakonshme. Gjëja tjetër që kemi bërë është që kemi rritur pensionet duke hequr një tavan që ishte diskriminues. Kush ka dalë në pension pas vitit 2015 kur hyri në fuqi skema e re , kemi pasur pensione mbi tavan. Unë ju them sot të rinjve që nëse doni të bëni një kontribut për gjyshërit tuaj, paguani sigurimet shoqërore se kjo funksionon si skemë solidariteti. Të rinjtë që janë sot në punë, që paguajnë sigurimet shoqërore, që nuk janë në të zezë por në të bardhë, sigurojnë që mbushin arkën me të cilët paguhen pensionet e gjyshërve“, u shpreh Veliaj.
Kryetari i Bashkisë theksoi ndër të tjera se Tirana do të ketë një plan social për t’iu përgjigjur lëvizjeve demografike të popullsisë drejt kryeqytetit, për të ofruar edhe shërbimet e nevojshme.
“Disa nga gjërat që ne besojmë duan planifikim, urbanizim, por mbi të gjitha planifikimi social. Planifikimi social nuk duhet të jetë vetëm në raste krizash, por duhet të jetë në mënyrë sistematike , si ajo që bën Caritasi me të moshuarit, që u çon kujdesin infermier, kujdesin ushqimor dhe në nivel shtëpie. Duhet në nivel kapilar, me administratorët e pallateve, me administratorët e njësive që ne të kemi një hartë ekzakte të nevojave që ka komuniteti“, tha Kryebashkiaku Veliaj.
Përpos investimeve të Bashkisë në kënde lojërash për fëmijë, paralelisht do të investohet edhe për hapësira çlodhëse për moshën e tretë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.