Shërbimet e nënkontraktuara – Kush punëson studentë, avantazh në kontratat nga shteti
Në kushtet kur situata me call center në vend vazhdon të jetë akoma nën panik për masat e marra nga Italia fqinje, vëmendja duket se është fokusuar në zgjerimin e mundësisë për shërbimet e tjera të nënkontraktuara të lidhura sidomos me IT.
Por ngërçi që haset duket se ka të bëjë me mungesën e mundësive për të sapodiplomuarit të cilët përgjithësisht gjejnë dyert e biznesit mbyllur.
Këta të fundit preferojnë të punësojnë punonjës me eksperiencë duke i hequr vetes koston e trajnimit.
Gjithsesi Këshilli i Investimeve duket se ka gjetur një mënyrë që studentët apo të sapodiplomuarit të gjejnë hapësira për të krijuar eksperiencë.
Në njërin prej rekomandimeve thuhet se bizneset që punësojnë të rinj apo të sapodiplomuar mund të kenë avantazh në kontratat që jep shteti.
“Të konsiderohet, incentivimi nëpërmjet kontratave që kompanitë IT marrin nga shteti si p.sh përfshirja në termat e referencës e trajnimeve në IT ose marrja e studenteve apo sapodiplomuarve për internship në profesione relevante me tenderin e fituar për një periudhë kohe të caktuar” thuhet në rekomandimin e Këshillit duke nënvizuar se afati për implementimin është afatmesëm duke lënë një hapësirë prej rreth një viti për të konceptuar mënyrën sesi do të jepet kjo lloj incentive.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.