Shërbimet publike – Mesi: Shumë afër miratimit të ‘kartës së qytetarit’
Së shpejti pritet të miratohet karta e të drejtave të qytetarit për përfitimin e shërbimeve publike. Lajmin e ka bërë të ditur zëvendëskryeministrja, Senida Mesi, sipas së cilës projektvendimi i Këshillit të Ministrave është ende në proces Konsultimi Publik.
Ai përcakton të drejtat kryesore të qytetarëve dhe sipërmarrësve përgjatë procesit të ofrimit të shërbimeve publike nga ana e administratës shtetërore.
Projektvendimi përfshin një sërë të drejtash, si ajo për informim, akses në shërbimet publike, për zgjidhje efektive, për procedimin e kërkesës sipas radhës së aplikimit, të drejtën për ankim si dhe një sërë të drejtash të tjera.
Këto të drejta lidhen me rregullat e sjelljes që administrata duhet të ketë në sportelet e shërbimit, mënyrën e aplikimit për marrjen e shërbimit, si dhe rregullat për mënyrën e përdorimit të formave dhe funksionalitetin e kanaleve të ndryshme të ofrimit të shërbimeve publike.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.