Sheshi Skënderbej – Veliaj: Të shtunën hapet hapësira më e madhe për këmbësorët
Ditën e shtunë do të hapet sheshi “Skënderbej”. Lajmin e ka dhënë kryetari i bashkisë Erion Veliaj gjatë një aktiviteti për bilancin në njësinë 11 në Tiranë. Veliaj gjatë fjalës së tij para banorëve u shpreh se tashmë do i kthehet qytetarëve hapësira më e madhe për këmbësorët.
“Një ndër gjërat madhore për të cilat do të doja të bëja një ftesë është hapja e sheshit Skënderbej që do të ndodhë ditën e shtunë, në 19:30. Çdo person e banor i Laprakës është i ftuar në hapjen e sheshit Skënderbej sepse është sheshi i të gjithë shqiptarëve, nuk është vetëm i qendrës së Tiranës. Do të kemi shumë shqiptarë që do të vijnë nga Kosova, Maqedonia, Mali i Zi, Greqia dhe besoj që do të kemi mundësi që më në fund t’i kthejmë dinjitetin qendrës së qytetit”.
Veliaj premtoi se gjatë dy viteve të ardhshme, investimet e Bashkisë së Tiranës do të shtrihen në nivel kapilar në çdo lagje. Sipas kryebashkiakut, Bashkia synon që çdo vit të rehabilitojë 50 blloqe banimi.
“Një nga fokuset kryesore tani që janë rregulluar gjërat e mëdha, tani që hapet sheshi Skënderbej, tani që hapet Bulevardi i ri, tani që mbaruam me Pazarin e Ri, tani që mbaruam me Parkun Olimpik, na jepet mundësia që ne të fillojmë dhe të punojmë më shumë nëpër lagje. Ne çdo vit kemi bërë një plan që të riparojmë 50 blloqe. Që do të thotë nëse bëjmë 50 blloqe në vit, i bie rreth 200 në gjithë mandatin tonë”, u shpreh kryebashkiaku.
Kreu i Bashkisë deklaroi se është vetëm çështje kohe dhe përfundimi i punimeve për kinemanë e re të Laprakës e cila do të shërbejë edhe si një qendër komunitare në këtë zonë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.