Shfaqen dyshime mbi propozimin e Macron për ‘komunitetin’ e ri të shteteve aspirante në BE!

Presidenti i Francës Emmanuel Macron ka ringjallur një ide të vjetër dekadash me një propozim për një formë të re të bashkëpunimit europian që shkon përtej BE-së, por detajet se si do të funksiononte një mekanizëm i tillë mbeten të errëta dhe gjithashtu të diskutueshme.

Për listën gjithnjë në rritje të vendeve anëtare aspirante, madje edhe Britaninë pas Brexit, një klub më i gjerë europian mund të ofrojë një alternativë për koordinimin për çështjet politike dhe të sigurisë, ndërsa ata presin anëtarësimin që shpesh mund të zgjasë me vite.

Por propozimi i Macron-it, i paraqitur në një fjalim kryesor në Parlamentin e BE-së të hënën, ka ngjallur tashmë polemika mbi perspektivën që mund t’i ofrohet Ukrainës në vend të anëtarësimit të plotë.

Por pyetjet mbeten mbi çështjet qendrore të tilla si nëse klauzola e ndihmës reciproke në traktatin e BE-së do të zbatohej për anëtarët e këtij komuniteti të ri hipotetik, tha Christine Verger, nënkryetare e Institutit Evropian Jacques Delors.

Ukraina, e cila po lufton me pushtimin e Rusisë, po kërkon anëtarësim të shpejtë në BE, por Macron hodhi poshtë të hënën një proces të shpejtë aplikimi, duke sugjeruar se një klub më i gjerë dhe i ndryshëm do të ishte më efikas dhe se Kievit mund t’i duhen dekada për t’u bashkuar me BE.

Por Ukraina paralajmëroi se një bllok i ri nuk mund të jetë një zëvendësues për anëtarësimin në BE, pasi ajo pret vendimin e Komisionit Europian nëse do t’i japë vendit statusin e kandidatit që pritet në qershor.

“Nëse nuk e marrim statusin e kandidatit, kjo do të thotë vetëm një gjë, se Europa po përpiqet të na mashtrojë. Dhe ne nuk do ta gëlltisim atë,” i tha Financial Times Ministri i Jashtëm i Ukrainës Dmytro Kuleba.

Presidenti i Lituanisë Gitanas Nauseda shtoi se ideja e Macron ishte “një përpjekje për të mbuluar mungesën e dukshme të vullnetit politik për të marrë vendime vendimtare për dhënien e statusit të kandidatit” për Ukrainën. France24

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.