Shfrytëzimi i hapësirave publike pa pagesë – Ja ndihma që ky kryeqytet po i jep bareve dhe restoranteve
Kryeqyteti i Lituanisë, Vilnius, është duke u shndërruar në një kafene gjigante të hapur pasi autoritetet kanë lejuar tashmë baret dhe restorantet të vendosin tavolina jashtë falas por duke respektuar rregullat e distancës sociale teksa vendi gradualisht lehtëson kufizimet e bllokimit.
Dyqanet, parukierët dhe sallonet e bukurisë, bibliotekat, muzetë dhe kafenetë u lejuan të rihapeshin në të gjithë Lituaninë të Hënën ndërsa vendi filloi të heqë disa kufizime të vendosura për të zvogëluar përhapjen e pandemisë COVID-19.
Shteti Baltik ka regjistruar 44 vdekje dhe 1.344 raste të virusit që nga fillimi i shpërthimit, sipas një informacioni nga Universiteti John Hopkins.
Por kafenetë dhe restorantet ende duhet t’u përmbahen rregullave të rrepta të distancës fizike, në mënyrë që të rifillojnë punën me karriget e lejuara vetëm jashtë dhe klientët e ulur në tryeza të ndryshme të jenë së paku dy metra larg.
Sipas kryetarit të komunës së Vilnius, Remigijus Šimašius, do të përjashtohen shumica e bizneseve të mikpritjes në Qytetin e Vjetër të renditur në Unesco, ku rrugët e ngushta me kalldrëm lënë pak hapësirë për ulje në natyrë.
Prandaj qyteti ka vendosur të hapë 18 vende publike për t’u përdorur nga kafenetë dhe restorantet.
“Piacat, sheshet dhe rrugët – kafenetë e afërta do të jenë në gjendje të vendosin tavolina në natyrë pa pagesë këtë sezon dhe kështu të zhvillojnë aktivitetet e tyre gjatë karantinës. Thjesht hapni, punoni, mbani punë personelin dhe mbani Vilniusin gjallë”, tha Šimašius javën e kaluar.
Më shumë se 162 kafene, bare dhe restorante kanë aplikuar për të vendosur tavolinat në natyrë në vende publike dhe qyteti ka thënë se më shumë hapësirë mund të vihet në dispozicion nëse është e nevojshme.(Euronews)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.