Shfrytëzimi i pyjeve – Trajtimi, nga subjektet me licencë të kontraktuar nga bashkia

Trajtimi i pyjeve nga bashkitë për sigurimin e nevojave për ngrohje gjatë stinës së dimrit do të realizohet nga subjektet me licencë të kontraktuara nga bashkia.

Sipas vendimit të këshillit të ministrave, shfrytëzimi i fondit pyjor privat do të jetë i njëjtë me shfrytëzimin në pyjet e bashkisë nga kompanitë që shpallen fituese përmes  tenderimit.

Nxjerrja e ngastrave për trajtimin e grumbujve pyjorë do të bëhet me ekonomi pyjore. Strukturat e këtij shërbimi lejojnë kompaninë të kryejë aktivitetet vetëm në atë ekonomi pyjore për të cilën është dhënë leja përkatëse.

Kompanitë që shfrytëzojnë material drusor, sipas këtij vendimi mbajnë përgjegjësi të plotë për dëmet që shkaktohen në ekonominë pyjore ku punojnë.

Subjektet të cilat kanë fituar me ankand të drejtën e shfrytëzimit para hyrjes në fuqi të ligjit për moratoriumin në pyje dhe kanë pasur kontrata të vlefshme, kanë të drejtën e shfrytëzimit të tyre deri në përmbylljen e kontratës.

Koha e pezullimit të kontratës që nga momenti i hyrjes në fuqi të moratoriumit do ti shtohet kontratës së rinegociuar me bashkinë.

Trajtimet dhe prerjet rigjeneruese në fondin pyjor publik dhe privat janë veprimtari që përgatiten nga strukturat e shërbimit pyjor në bashki, si autoriteti përgjegjës për menaxhimin e qëndrueshëm të fondit pyjor, duke përcaktuar masa teknike, teknologjike e financiare që mundësojnë realizimin e tyre, në përputhje me kërkesat e ligjit.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.