Shifrat e Bursës – 5 milionë euro tregtim në ditët e para
Tregtimi i titujve të qeverisë gjatë ditëve të para të aktivitetit të bursës ka arritur në rreth 650 milionë lekë ose rreth 5 milionë euro. Sipas statistikave të publikuara nga Bursa Shqiptare e Titujve, ALSE, tregtimi në ditët e para ka regjistruar volume të kënaqshme, ndonëse numri i transaksioneve ende është i kufizuar.
Në shtatë transaksione të regjistruara në Bursë, pesë prej tyre kanë pasur objekt bonot e thesarit dhe dy të tjera obligacionet qeveritare. Në volume, rreth 85% e shumës së tregtuar ka qenë në bono thesari dhe 15% në obligacione.
ALSE nisi tregtimin e titujve më datë 22 shkurt, pasi u licencua nga Autoriteti i Mbikëqyrjes Financiare në korrik të vitit të kaluar. Sipas kushteve të licencës, në vitin e parë të aktivitetit Bursa Shqiptare e Titujve mund të bëjë tregtimin e titujve të lëshuar nga qeveria shqiptare.
Objektivi i bursës është të krijojë për herë të parë një treg të mirëfilltë kapitali në Shqipëri, ndërkohë që potencialet e tregut paraqiten në rritje. Tashmë, disa kompani kanë filluar emetimin e titujve të borxhit.
Bursa i hap rrugë emetimit të këtyre obligacioneve me ofertë publike dhe, mbi të gjitha, do të mundësojë tregtimin e tyre të vazhdueshëm pas emetimit, duke i kthyer në një instrument financiar likuid.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.