Shifrat e Instat – Sa ushqime dhe pije importoi Shqipëria në 2 mujorin e parë të 2020
Shqipëria ka importuar 15.7 miliardë lekë grupmallra ushqimore, pije dhe duhan, në periudhën janar – shkurt 2020. Sipas të dhënave të Instat, shifra këto më të larta se për të njëjtin 2 mujor të vitit 2019, ku kjo vlerë ishte 15.2 miliardë lekë.
Nga ana tjetër, përsa i përket eksporteve, në total Shqipëria eksportoi ushqime, pije dhe duhan në vlerën 4.3 miliardë lekë (janar – shkurt 2020). Ndërkaq, për të njejtën periudhë të vitit 2019, kjo shifër ishte 4.2 miliardë lekë, afro 100 milionë lekë më e ulët.
Përsa i përket shifrave të përgjithshme të shkëmbimeve tregtare, në dymujorin e parë të vitit 2020, krahasuar me të njejtën periudhë të një viti më parë, eksportet e mallrave arritën vlerën 47 miliardë lekë, duke u rritur me 6.5 %.
E njejta rritje, edhe pse në një përqindje të vogël, 1.7%, u dallua edhe në importin e mallrave, i cili arriti vlerën 94 miliardë lekë. Nga ana tjetër, deficiti tregtar arriti vlerën 46 miliardë lekë, duke u ulur me 2.7 %, krahasuar me janar – shkurt 2019.
Gjatë këtij 2 mujori, referuar shifrave të Instat, vendet me të cilët Shqipëria ka pasur rritje më të madhe të importeve janë Turqia, me afro 17%, Greqia , me 16.7% dhe Gjermania, me 10%. Nga ana tjetër, vendet me të cilat importet kanë pasur uljen më të madhe janë Italia, me afro 2%, Kina, me 1.4 % dhe Serbia, me 8.5%.
Përsa i përket eksporteve, Shqipëria në periudhën janar – shkurt 2020 ka ndjerë një rritje të konsiderueshme me Spanjën, me 46%, me Kosovën, me 6.3%, si dhe me Gjermaninë, me afro 23%. Nga ana tjetër, eskportet kanë ndjerë rënie me Italinë, Francën, si dhe me Rumaninë.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.