Shitja e energjisë – KESH siguron 8.5 mln euro, hap dhe një procedurë për 49600 mwh

8.5 milion euro është shumë e siguruar nga Korporata Elektroenergjetike Shqiptare si pasojë e shitjes së energjisë për periudhën 1-30 prill.

Reshjet e shiut duket se kanë favorizuar ndjeshëm prodhimin e energjisë, duke bërë që një pjesë e saj të shitet duke siguruar të ardhura për kompanitë e gjenerimit.

Paralelisht, KESH ka hapur edhe një tjetër procedurë shitjeje për 49600 mwh, për periudhën 1-4 prill, çka do të sigurojë të tjera të ardhura për kompaninë. Shitja e energjisë vjen pas një viti të vështirë për korporatën, sikurse ishte viti 2017, i cili u mbyll me humbje.

Sipas bilancit vjetor niveli i humbjeve u regjistrua në rreth 1.1 miliard lekë, ndryshe nga një vit më parë ku u regjistrua një bilanc pozitiv prej 1.7 miliard lekë. Kjo situatë ishte e pritshme, për shkak të shpenzimeve të kryera për blerje të energjisë, si pasojë e mungesës së reshjeve.

Edhe në bilancin e energjisë, vërehej sasia më e ulët e prodhuar, në krahasim me vitin 2016. Sipas të dhënave zyrtare në 2017-ën u prodhuan rreth 3.5 milion MwH, ndërsa për një vit më parë kjo sasi ishte 6.2 milion MwH, apo rreth 50% më e lartë.

Thatësia e tejzgjatur gjatë vitit 2017 uli prodhimin e energjisë elektrike me 36.6% krahasuar me një vit më parë, duke ndikuar ndjeshëm në rritjen e importeve dhe rënien e eksporteve.

Sipas bilancit të energjisë, publikuar nga Instituti i Statistikave, me rënie të prodhimit të energjisë elektrike kanë rezultuar të gjithë prodhuesit e energjisë, si hidrocentralet publike dhe hidrocentralet private dhe koncensionare, çka rriti importet me 86.3%.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.