Shitja e rrobave në kohën e Covid – Masat që duhet të zbatojnë bizneset e qytetarët për të frenuar përhapjen e virusit
Prej datës 27 prill ka rinisur tregtimi me pakicë i rrobave, teksa këto bizneset duhet të zbatojnë një sërë masash, për të frenuar përhapjen e COVID-19. Protokolli higjieno-sanitar parashikon masa edhe për blerësit.
Këto biznese janë kategorizuar me kodin jeshil nga institucionet shëndetësore, çka do të thotë se janë me risk të ulët. Megjithatë, ato duhet të garantojnë një sërë masash duke filluar me përdimrimin e masave mbrojtëse, sikurse janë maskat dhe dorezat nga ana e personelit, teksa këto produkte duhet të sigurohen nga punëdhënësi. Gjithashtu, në hyrje të çdo dyqani duhet ofruar produkti higjenizues për duart e klientëve , me minimalisht 60% alkool.
Po ashtu, duhet të garantohet dhe respektohet në çdo moment distance prej 2 metrash midis klientit dhe shitësit, ndërkohë që subjekti duhet të shërbejë vetëm 1 klient në ambiente më të vogla se 30 m2. Gjithashtu, këto biznese duhet të vendosin xham mbrojtës klient-shitës.
Protokolli saktëson gjithashtu se subjekti duhet të afishojë në një vend të dukshëm mundësinë e blerjeve online.
Paralelisht këto subjekete detyrohen të kryejnë dezinfektimin e ambientit para hapjes dhe pas mbylljes, sidomos të tavolinave, banaqeve, telefonave dhe çdo hapësirë ku ka patur kontakt prekje. Ndërkaq, Protokolli higjieno-sanitar parashikon edhe një sërë masash për blerësit, që gjithashtu duhet të jenë të pajisur me maska e doreza në momentin që hyjnë në dyqan. Po ashtu ata duhet të dezinfektojnë duart në hyrje dhe në dalje, ndërkohë që në asnjë rast nuk lejohet kontakti shitës-klient. Ndërkaq, protokolli vendos edhe një tjetër detyrim, që duket se do të ndryshojë mënyrën e blerjes së veshjeve.
Subjektet që nuk zbatojnë këto masa do të përballen me penalizime nga ana e Inspektoratit Shtetëror Shëndetësor. Megjithatë bizneset thonë se aktualisht blerjet janë minimale, kjo edhe për shkak të orarit të kufizuar të lëvizjes së qytetarëve.
Aktualisht një sërë biznesesh duket se i janë përshtatur këtyre masave, ndërsa shumë të tjerë vazhdojnë të tregojnë në të njëjtën formë sikurse ndodhte edhe përpara epidemisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.