Shitjet e biznesit – Rritja mbështetet nga ndërtimi dhe industria
Indeksi i shitjeve në sektorin prodhues të ekonomisë shqiptare u rrit me 6.9% në tremujorin e dytë të vitit. Sipas të dhënave nga Instituti i Statistikave, sektori prodhues ka përfituar nga rritja e përgjithshme e shpenzimeve në ekonomi për tremujorin e zgjedhjeve, ndërkohë që forcimi i shitjeve u mbështet edhe rimëkëmbja në segmentin e industrisë nxjerrëse.
Sipas INSTAT, shitjet në industrinë nxjerrëse u rritën me 16.3% ndaj të njëjtës periudhë të një viti më parë, të shtyra nga rritja e çmimit të lëndëve të para, me përfitime sidomos në industrinë e nxjerrjes së naftës. Ndërkohë, edhe industria përpunuese për tremujorin e dytë shfaqi një rritje të përmirësuar, me 3.5%, krahasuar me të njëjtën periudhë të një viti më parë.
Në përmirësim rezultoi edhe indeksi i shitjeve në energjetikë. Pas rënies në tremujorin e parë, për tremujorin e dytë shitjet në këtë sektor u rritën me 5.2% me bazë vjetore.
Ndërkohë, sektori që ka përfituar më shumë nga shpenzimet elektorale natyrshëm ka qenë ndërtimi. Për tremujorin e dytë, indeksi i shitjeve është rritur me afro 34%, i mbështetur sidomos nga projektet e mëdha inxhinierike, por edhe nga një rritje e investimeve publike në infrastrukturë.
Ndërsa dega me peshën më të lartë në ekonominë shqiptare, ajo e shërbimeve, për tremujorin e dytë regjistroi një rritje vjetore modeste me 1.1%. Të dhënat e shitjeve për tremujorin e dytë tregojnë se rritja mbetet e përqendruar sidomos te industria nxjerrëse dhe ndërtimi. Ndërkohë, dy degët me peshë më të lartë në ekonomi, shërbimet dhe sidomos industria përpunuese shfaqin një rritje më modeste.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.