Shitjet e biznesit – Rritje e ngadaltë edhe në tremujorin e dytë

Shitjet e biznesit prodhues këtë vit po rriten me ritme më të ngadalta. Në industri, indeksi i shitjeve u rrit me 4.3%, në ngadalësim të mëtejshëm nga niveli 4.5% i tremujorit të parë. Sipas të dhënave të Instat, sidomos industria nxjerrëse vazhdon të ketë një ecuri të luhatshme dhe në tremujorin e dytë të vitit shënoi një rritje të shitjeve me vetëm 1.1%. Industria përpunuese duket më e qëndrueshme në rritjen e saj dhe shitjet u zgjeruan me 5.5%.

Siç pritej, në sektorin e energjisë elektrike shitjet pësuan rënie të ndjeshme, me 12.6% më pak krahasuar me një vit më parë, për shkak të keqësimit të kushteve hidrike dhe rënies së prodhimit. Më e papritur ishte përkeqësimi i sektorit të ndërtimit. Pasi shitjet u ngadalësuan në tremujorin e parë, në të dytin ato pësuan rënie, me 1.8% më pak kundrejt të njëjtës periudhë të një viti më parë.

Një rritje më e ngadaltë e shitjeve vërehet edhe në shumicën e sektorëve të shërbimeve. Sektori më i rëndësishëm, tregtia, regjistroi një rritje të shitjeve me më pak se 3%. Degët që shfaqin një rritje disi më të lartë janë ato të lidhura me turizmin, si hotelet, bar-restorantet dhe agjencitë e udhëtimit, të gjitha aktivitete që kanë përfituar nga rritja e turizmit hyrës në vend. Sidoqoftë, edhe në këto degë rritja është larg niveleve dyshifrore që patën regjistruar vitin e kaluar.

Indeksi i shitjeve është një tregues pjesërisht orientues për ecurinë e prodhimit të brendshëm bruto. Një rritje e më e ngadaltë e shitjeve ka gjasa të reflektohet në ritme më të ulëta të rritjes së prodhimit kombëtar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.