Shitjet e makinave në Europë – Rimëkëmbja ekonomike rrit kërkesën te konsumatorët dhe bizneset
Shitjet e makinave në Europë janë rritur me 5.8% në muajin Nëntor, me modelet e reja SUV nga prodhuesit francezë, Peuget dhe Citroen si dhe nga rivalët aziatikë, që kanë tërhequr blerësit në një kohë të rimëkëmbjes ekonomike.
Regjistrimet u rritën në 1.26 milionë automjete, krahasuar me 1.19 që qëndronin një vit më parë, raporton Shoqata Europiane e Prodhuesve të Makinave (ACEA). Shitjet nga Janari në Nëntor u rritën me 4%, në 14.5 milionë makina.
Rajoni pritet të sjellë volumin më të madh vjetor të dërgesave në një dekadë, duke kthyer faqen e krizës së borxhit në Europë që solli ndikim të gjerë negativ në këtë treg. Rimëkëmbja ekonomike ka inkurajuar konsumatorët dhe bizneset që të shpenzojnë në automjete.
Kërkesa për modelet SUV ka nxitur kompani si Volkswagen e deri te prodhuesit e makinave luksoze si Ferrari që të shtojnë këto linja në kategoritë e tyre.
Marka Citroen e grupit francez PSA, që nisi dërgesat e modelit C3 Aircross në muajt e kaluar, publikoi një rritje me 15% të shitjeve në Europë për Nëntorin, ndërsa Peugeot, shiti 20% më shumë makina prej kërkesës së madhe për modelet 3008 dhe 5008. Rivali francez Renault publikoi një rritje me 10% në rajon, me modelin Logan MCV Stepway që nxiti shitjet e njësisë low-cost Dacia me 25%.
Toyota, prodhuesi i dytë më i madh në botë dhe i teti në Europë, pati një rritje të shitjeve me 12% në rajon, prej modelit C-HR. Kia, prodhuesi i dytë më i madh korean pas Hyundai, pati rritje të shitjeve me 13%.
Në 5 tregjet kryesorë, rritje ka pasur në Gjermani, Francë, Itali dhe Spanjë, ndërsa kërkesa në Mbretërinë e Bashkuar ra me 11% prej shqetësimeve të konsumatorit në lidhje me Brexit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.