Shkaqet e përkeqësimit të situatës financiare të bashkive – Flet në “Përtëfol” kreu i zbatimit të reformës territoriale , Artan Shkëmbi
Rritja e të ardhurave vendore si pasojë e një menaxhimi më të mirë fiskal, ishte një nga synimet kryesore të Reformës Administrative Territoriale, natyrisht pa lënë mënjanë përmirësimin e shërbimeve publike.
Por përqendrimi i pushtetit vendor, nuk ka sjellë një situatë më të mirë financiare, për të paktën 13 prej tyre, që janë klasifikuar nga Drejtoria e Përgjithshme e Tatimeve si borxhlinj të këqij dhe ndaj tyre do të nisë arkëtimi i detyrimeve me forcë.
I ftuar në emisionin “PërTëFol” në TV SCAN, Drejtori i Agjencisë së Zbatimit të Reformës Territoriale, Artan Shkëmbi, thotë se kjo situatë nuk lidhet me reformën, por me menaxhimin e vendorëve.
Megjithatë, Shkëmbi pohon se shkak për keqësimin e situatës financiare të njësive vendore janë bërë edhe vendimet e qeverisjes qendrore, që prekin drejtpërdrejt financat e pushtetit lokal.
“E kam bërë të qartë, se në çdo rast shkaktari i problematikave që kanë pasur bashkitë, kanë qenë qeverisjet qendrore”.
Reforma Administrativo-Territoriale synoi konsolidimin e njësive të vogla të qeverisjes vendore në njësi më të mëdha dhe më efikase, për të ofruar shërbime më cilësore për qytetarët. Dy vjet pas reformës territoriale, sa është arritur ky qëllim?
“Në disa zona ka përmirësim, por në të tjera ka keqësim të situatës. Megjithatë kjo nuk do të thotë se në një të ardhme të shpejtë, edhe aty të jetë gjendja më e mirë. Sa i përket perceptimit të qytetarëve, është se u janë larguar shërbimet, pasi ishin mësuar që të takonin edhe për probleme personale kryetarin e komunës”.
Sipas Shkëmbit, në përmirësimin e shërbimit, do të ndikojë edhe dixhitalizimi i arkivave të bashkive. Ky proces do të realizohet brenda një viti e gjysmë, nga kompania e kontraktuar nga projekti “Star 2”.
Reforma territoriale riorganizoi pushtetin vendor në 61 bashki, nga 373 ish-bashki dhe komuna, por për Shkëmbin nuk duhet të ketë më shumë se 45 njësi të tilla.
Dafina Hysa/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.